Mayor Rama nabawsan
Ngano nga ang mga adviser ni Mayor Mike Rama wala man makapahibawo kaniya nga hugaw kaayo ang ihawan sa North Reclamation Area, lakip ang water treatment niini nga wala na mag-andar busa gipabuhagay ra diretso ang hugaw sa ihawan ngadto sa Mahiga Creek?
Mao bitaw nga diha’ng iyang giwitkan si Mayor Jonas Cortes sa Mandaue kay nagtuo siya nga dili usab siya sawayonon sa pagkahugaw sa Mahiga Creek, nakadesider si Cortes pagpa-inspection sa Cebu City abattoir pinaagi sa iyang mga sakop.
Unya gawas nga nasayran nga dili kaayo limpyo ang iwahan sa dakbayan sa Sugbo, gipaninglan pa ang Cebu City government sa bayranan sa buhis sa maong ihawan.
Kay ang gitukoran diay sa ihawan sakop na sa Mandaue City busa may katungod si Cortes pagpasusi niini kun nagbayad ba og husto’ng buhis ang kagamhanan sa Cebu City sa ilang ihawan.
Tingale kun gipahibawo pa lang si Rama sa iyang mga sinaligan sa kahimtang sa ihawan nga anaa sa NRA dili tingale siya magpatuyang pagsaway sa Mandaue nga wala magtagad sa kahugaw sa Mahiga Creek.
Mas maayo bitaw nga una kita manaway sutaon usa nato kun dili ka ba usab salawayon.
Atol sa ilang panagtagbo, si Mayor Cortes gilamano ni Mayor Rama ug kalma ra kaayo nga mipaubos sa iyang kaugalingon apan bug-at usab kaayo ang gibawos niya’ng witik kang Rama.
Busa mas labi’ng maayo nga ang mga adviser ni Rama motug-an g’yud sa mayor sa tinuod nga kahimtang sa palibot sa Cebu City aron nga dili magsalig ang mayor nga perpekto na siya sa pagdumala sa tanang aspeto sa kalihokan sa siyudad.
- Latest
