Ang landong sa kahoy Niadtong

Niadtong gisulat ko ni, gihugonhugon na nga ang Filipinas, nakalabaw na sa gidaghanon nga tanom nga punoan sa kahoy. Naapsan niini ang India nga sa 2013, sila maoy opisyal nga nadeklarar sa Gueness Book of Records isip kinadaghanang natanom nga kahoy sa tibuok kalibutan.

Mas daghang kahoy nga matanom mas maayo, ilabi na  dinhi sa atong kabukiran halos nangaupaw na.Tungod kini sa dili estrikto nga pagpatuman sa ilegal nga pamutol. Kulang ang pakabana sa pagpanalipod sa atong mga kahoy, aron unta ang lasang mokatap sa atong kabukiran o sa palibot nato.

Maayo gani aron mas maseguro nga mas modaghan ang matanom natong mga kahoy, himuong rekisitos ang tree planting sa mga estudyanteng mogradwar, sa promosyon o mangaplay sa trabaho, o ubang mga sertipikasyon diha sa buhatan sa gobiyerno.Unya monitoron nga mabuhi gyud.

Nindot kaayong tan-awon ang dapit labi na sa mga dakbayan, nga manguhong o maglumbay ang mga punoan sa kahoy. Mopamenus kini sa kaigang o kainit sa adlaw. Makatabang kini paglimpyo sa hingoson natong hangin, nga abunda sa oksehena (oxygen) ang palibot.

Ang landong sa kahoy, makapahimsog sa atong panglawas kay suyopon man sa mga dahon ang mga pulosyon o makahilong hangin. Labi na anhi ka magpasilong o magpahayahay o kaha mag-ehersisyo, epektibo ni makapaluag sa gihambing kabug-at o stress. Mohapsay ang panghunahuna ug sa kasayon makapalandong ka kun unsay tukma o maayong buhaton. Aktibo ug positibo sa kaugmaran sa kinabuhi, nga bisan sa kahasol dili mo kini igsapayan.