Naghinobrang propaganda

Ang nahitabo ni Jeffrey Laude dili simple nga kasong kriminal tungod kay naglambigit kini og usa ka bayot ug usa ka sakop sa US Marines. Kinahanglan kining tutokan sa atong mga awtoridad, ilabi na ang mga imbestigador aron maseguro nga kaprotehian ang mga ebidensiya batok sa suspetsadong si Private First Class Joseph Scott Pemberton.

Dili kini simpleng kaso, apan angayan pa ba kining padak-on sa mga aktibista ug mga militanteng grupo nga hasta na ang mga isyu nga walay labot ning kasoha i-apil na sa pagtuki ug tuison ang mga argumento aron lang ikapasupot ang gusto nilang i-estorya ngadto sa publiko?

Sentido komon lang ang palihokon, masayran nato unsa nga pagkatawo si Jeffrey Laude.

Ang “facts” sa kaso nga si Jeffrey usa ka bayot nga gipatay ni Pemberton sulod sa motel. Walay molalis niining bahina nga si Jeffrey gipatay sulod sa motel.

Nag-unsa man sila sa motel?

Adunay trabaho si Jeffrey nga gikondenar sa balaod. Apan kini nga kamatuoran maayo nga pagkatago human ma-estorya sa mga aktibista ug mga militanteng grupo ang iyang pamilya.

Gikan sa iyang unang adlaw sa haya hangtod siya nalubong kagahapon, walay puas ang pagpa-interbiyu sa iyang pamilya ug sa mga tawo nga nangangkong nagtabang pagkab-ot sa hustisya alang kang Jeffrey. Ug sa mga interbiyu mitumaw nga si Jeffrey mas naila sa iyang ngalan nga “Jennifer.”

Mokagot akong bag-ang sa higayon nga makadungog ko sa mga aktibista ug militante sa interbiyu sa telebisyon nga moingon nga ang nahitabo kang Jeffrey “rape” ug “murder.”

Pastilan na lang gyud kining mga militanteng pundok kun maka-propaganda, bisan klaro na kaayong dili kamatuoran, ila na lang gyung ipamugos.

Kun rape ang nahitabo, nganong sa motel man siya nakit-ing patay? Gidala siya ni Pemberton sa motel aron lugoson una pa patyon? Ug nganong wala man siya pusila o dunggaba? Nganong ginudnod man sa “bowl” sa kasilyas iyang nawong nga maoy gituohang hinungdan sa iyang kamatayon?

Adunay mga testimoniya sa habig ni Pemberton nga nagkanayon nga si Jeffrey gipik-ap sa hubog nga Marines alang sa bayranan nga kalipay. Ug nagtuo ang Marines nga babaye ang iyang napik-ap, apan nasuko sa dihang iyang nadiskubrehan diha sulod sa motel nga dili diay babaye ang iyang napik-ap.

Tingale aduna pay mga estorya nga angay untang mapaminaw gikan ni Jeffrey, apan dili na nato madunggan tungod kay patay na siya.

Sama sa bayot, si Pemberto adunay angay ika-estorya apan gipugngan na tungod kay ang mga Pilipino, ilabi na ang mga militante mihuwes na kaniya sa nahitabo.