Desperadong Binay
Napapas na ang pasiuna nga pagpaka aron ingnon ni Bise Presidente Jejomar Binay nga wa siya mahasol sa mga pasangil sa pangurakot batok niya. Ang desperado niyang mga lakang karong bag-o nisukwahi sa iyang postura sa unang mga adlaw sa imbestigasyon sa Senate Blue Ribbon subcommittee: Nga isip ikaduhang labing taas nga opisyal sa nasud daghan siya og mas mahinungdanon nga gimbuhaton nga mas dinalian kay sa pagpanubag sa sabasaba sa iyang politikanhong mga kaatbang. Karon nanghagit na siya og debate, nipahamtang na og mga kundisyon aron moatubang sa Senado, nangayo na sa tabang sa iyang mga dumadapig ug nagpalaban na ni Presidente Noynoy Aquino.
* * *
Siya ra sab ang nibisto sa sekreto nilang panagtagbo ni Aquino sa Malakanyang dayong timaan sa unang anibersaryo sa makalilisang nga linog sa Kabisay-an sa niaging semana. Mas maayo pang nitak-om na lang sa detalye sa tigom. Kay makapaturok pa unta sa pagduda nga bisan managlahi ang ilang politikanhong partido nagpabiling lig-on ang ilang panaghigalaay. Mabalaka pa unta silang Interior Secretary Mar Roxas ug ubang mga alyado ni Aquino nga ang kasuod nilang Binay ug Aquino mahimo pang makapausab sa pahibawo ni Aquino nga ang itugpo niya sa 2016 mao ang kandidato nga makapadayon sa iyang kampanya batok sa pangurakot.
* * *
Apan wa matagbaw si Binay sa mga intriga nga nitumaw sa ilang panagtagbo ni Aquino. Gibutyag niya nga si Aquino ang nitanyag og tabang niya ug sa iyang pamilya atubangan sa mga pagsaway nga ilang nahiagoman. Nga nakapapugos ni Aquino pagbuak sa iyang kahilom ug nisukwahi sa bersiyon ni Binay sa ilang tigom: Si Binay diay ang nagpakitabang nga ipahunong sa mga alyado ni Aquino sa Senado ang imbestigasyon sa Senate Blue Ribbon subcommittee; apan gibalibaran siyang Aquino nga di niya magawongan ang mga senador. Inay magpaduding, nabisto hinuon ang kamat-an ni Binay. Di diay managana pagdangop sa bisan unsa na lang maniobra paglingkawas sa apiki niyang kahimtang.
* * *
Mas makaluluoy ang awhag ni Binay sa iyang mga dumadapig sa di pagbiya niya. Labi na nga way ek ang mga nipili niya pagka bise presidente niadtong 2010 pagpanalipod niya, pagsubli pagpadayag sa ilang pagsalig niya ug pagpahibawo sa ilang padayong pagpaluyo niya sa 2016. Nahingpit ang hulagway sa ka-desperado ni Binay dihang nipahamtang og dugang mga kundisyon human dawata ni Senador Antonio Trillanes ang iyang panghagit og debate: Nga kinahanglang himuon gawas sa Senado diin wa nay immunity si Trillanes. Labaw sa tanan, kinahanglan pa gyung mangandam na si Binay sa pakig-atubang sa mga senador karong Huwebes, Oktubre 30. Kay gipunit ni Senador TG Guingona, tsirman sa Senate Blue Ribbon Committee, nga ang tibuok komitiba ang mohimo sa imbitasyon alang niya.
* * *
- Latest
