Paglikay sa sunog

Matud pa nila, all roads lead to the cemetery karong umaabot Nobiyembre 1 ug 2 kay aron atong handumon ang adlaw sa mga santos ug minatay.

Nahimo na kining usa ka tradisyon nato’ng mga Pinoy ang paghandum sa atong mga minahal sa kinabuhi nga mitaliwan na ngadto sa laing kalibutan. Gihimo kini pinaagi sa paghalad ug pag-ampo, pagbisita sa mga sam-ang, pagdagkot og kandila ug paghalad og mga bulak ug uban pa.

Ang uban gani mopahimulos na sa mubo’ng panahon aron makabakasyon ug pipila lang ka adlaw. Kay manglakaw man ang tanan ug wala nay' ibilin sa panimalay, hinaot nga inyong masiguro pagsunod ang pipila ka pahimangno aron sa inyong pagbalik luwas ang panimalay sa mga kawatan ug sa sunog.

1. Una sa tanan, pagbiya ninyo sa inyong panimalay kinahanglan nga inyong masiguro og ibot ang tanang gipangsaksak nga mga appliances nga wala gamita. Mas maayo gani og pawngon ang tanang appliances ug walay ibilin nga nag-andar ug dayong palong ‘sab sa plangka.

2. Isigurado usab nga ang LPG valve inyong ma-off. Mas labing maayo og ilisan na’ng daan ang hose kun inyong namatikdan nga kini depektoso.

3. Daghan baya kanato ang magdagkot og kandila sa panimalay para pud lagi unta sa mga kalag nga libudsuroy kay ilaha baya kining adlaw mao nga maglaroy-laroy pud kini sila. Isigurado g’yud nga sa inyong pagbiya palongon ninyo aron hingpit nga layo sa sunog.

4. Mas labing maayo g’yud kun dunay mabilin nga tawo sa atong panimalay.

Pipila lang kini ka mga sugyot aron hingpit nga luwas ang atong panimalay sa sunog. Mas maayo man nga sa atong pagbiya o pagbakasyon siguro kita nga luwas ang atong panimalay sa kadaot nga mamugna unya sa sunog ug ngadto usab sa mga akyat bahay nga mopahimulos sa panahon.

Ang inyong kabomberohan uban sa nagkalainlaing ahensiya sa gobiyerno nagpabilin nga naka-heightened alert aron sa pagsiguro nga hapsay ug malinawon ang atong pagtimaan sa adlaw sa minatay… Happy halloween!