EDITORYAL - Migara pagbalik ang ASG

Nakabalik na sa ilang pamilya ang magtiayong German nga gisignit sa mga teroristang Abu Sayyaf sa Palawan dul-an sa walo na ka bulan gikan sa Palawan ug gidala sa Sulu.

Pwerteng nakapanghimakak sa gobiyerno nga dunay kwartang nalambigit sa pagpagawas sa maong mga langyaw, apan ang Malacañang miklaro nga kung duna man dili kini gikan sa Pilipinas ug daw mihatag pa og pasumbingay nga angay mangutana ngadto sa German government.

Ang militar nangangkon nga na-pressure na ang mga bandido maong napugos silang buhian ang ilang hostages , apan dili ba kaha kay duna g’yuy gibayad nga ransom?

Dunay migawas nga balita sa The Philippine Star nga ang nangangkong tigpamaba sa ASG mibutyag nga nadawat na nila ang ransom nga 250 milyones dolyares. Bisan unsaon pa og diskarte sa AFP ug sa gobiyerno walay pagsalig ang gobiyerno sa Germany sa kapabilidad sa atong kasundalohan sa maong sitwasyon. Maayo pay mobayad nungka isugal ang kinabuhi sa ilang katagi-lungsod.

Mura’g salikwaot kaayong paminawon nga pwerteng pasiatab sa Armed Forces of the Philippines nga namenusan na ang gidaghanon sa Abu-Sayyaf, kini nakab-ot tungod sa tabang sa mga Amerkano isip mga ‘military advisers.’

Apan sa pagkatinuod, dako sila og natabang pinaagi sa electronic intelligence (ELINT) gathering nga magkompirmar sa aktwal nga impormasyon gikan sa intelligence operatives (HUMINT) sa lugar.

Apan sukad nga gipapauli na ang kadaghanan niining mga Amerkano sayo ning tuiga, daw mibalik na usab ang operasyon sa ASG. Gani giingong gawas sa Germans, duna pay onse ka hostages silang gikuptan.

Nagpasabot ba kini nga way nakuhang leksyon bahin sa kamahinungdanon sa modernong mga gamit ang AFP gikan sa mga Amerkano? Nganong wala man sila mo-invest niini?