EDITORYAL – Hagit alang ni Heneral Bañas

Ang nahitabo nga pagpatay sa usa ka polis didto sa tigbakayan sa Barangay Upper Lipata, Minglanilla kaniadto’ng Domingo, nagmatuod lang nga duna g’yuy mga polis nga imbes mopatuman sa balaod apan mao mismo ang mag-una-una.

Ang mga saksi miingon nga si PO2 Omar Parages mao mismo ang migunit sa hiniktan ug mobuhi na unta sa manok aron moaway na sa iyang kontra diha nga kalit lang mipaka ang buto sa armas ug natumba ang polis.

Daghang report nga ang rason ngano nga wala gayud masumpo ang mga tigbakay diha sa kabarangayan tungod kay adunay mga polis nga nagsilbi nga maoy protektor.

Samtang walay kamatuoran nga si PO2 Parages maoy protektor apan kuwestyonable ang iyang presensiya sa mao nga tigbakayan. Kay patay na man siya, maisip nga sirado na ang kaso.

Apan ang kadagkoan sa kapolisan angay nga moestrikto gayud sa paghimo’g aksyon batok sa ilang mga sakop nga dili motuman sa lagda nga dili sila mag-apil-apil niini’ng ilegal nga kalihukan.

Ang mga polis ug bisan ang mga opisyal sa barangay dili gayud unta angay nga moapil sa mga tigbakay kay sila pa man gani unta ang manakop. Sila pa man gani unta ang manakop, unya moapil na hinuon.

Unta kini’ng mao nga sayop nga binuhatan sa mga polis ug mga opisyal sa kabarangayan hatagan og pag-atiman ni PNP Regional Director Prudencio Tom Bañas pinaagi sa pagdakop sa mga hingtungdan.

Asa na man ang ilang giingon nga ang balaod ipatuman nga walay pagpinig kon “without fear and favor.”