Pataka na la’g pamaghot
Maka-uulaw ang gihimo ni Bise Presidente Jejomar Binay paghimo og opensiba ngadto kang Senador Antonio Trillanes ug kang DILG Secretary Mar Roxas isip balos sa wala pa matubag nga daghang isyu batok kaniya ug sa iyang pamilya.
Angay siya’ng maulaw og samot sa diha’ng mitingog si kanhi presidente ug karon Mayor Joseph “Erap” Estrada nga nagkanayon nga dili siya motuo’ng nagpaluyo si Roxas niini’ng nanggawas nga mga pasangil gikan sa overpricing sa Makati City parking building, kickback sa mga proyekto sa Makati, overpricing sa cake alang sa mga senior citizens, monopoliya sa kan-anan sa Makati ug ang bag-o, ang dili mapasabot nga kapanag-iyahan sa 350-ektaryas nga Hacienda Binay nga adunay mansion, man-made lagoon, nindot nga garden, aviary ug aduna pa g’yuy aircondition nga piggery.
Nakaila si Erap kang Roxas kay matud niya nahimo kini’ng miyembro sa iyang gabinete. Si Roxas ang naila’ng “father of call centers” kay siya ang nakapasugod niini sa diha’ng siya pa ang kalihim sa Department of Trade and Industry panahon ni Erap.
Gisulayan usab sa kampo ni Binay pagguba si Trillanes nga usa sa isog kaayo’ng mi-utingkay sa iyang mga isyu didto sa Senado pinaagi sa pag-expose sa iyang mga sakyanan. Apan nasupalpal ang iyang kampo kay ang mga sakyanan ni Trillanes mga karaan na ang model ug surplus pa ang uban, ug wala hinuon malikayi’ng makomparar sa iyang de-elevator nga balay ug mansion, mga luhong SUVs ug gara nga lifestyle.
Ang giingon sa United Nationalist Alliance nga “offense is the best defense” wala magsilbe. Sa ato pa, dili kini ang gikinahanglan karon nga uhaw ang mga Pilipino sa pagpasabot gikan sa iyang pamilya ning nagsunod-sunod nga isyu.
Ang pangutana, makabawi pa kaha si Binay ning mga alegasyon nga pagpangurakot ug pagpanag-iya sa iyang pamilya sa dili ma-esplikar nga binilyon nga kabtangan?
Sama sa nahitabo ni kanhi Senador Manny Villar, ang iyang kasikat nahilis lang og sayo tungod sa pag-expose ni kanhi Senador Panfilo Lacson sa isyu sa C-5 project. Kun wala ko malimot, ang pasangil mao nga ang kayutaan ni Villar mimahal og samot tungod kay naagian sa C-5 road nga iya ra usab nga proyekto diin gidudahan nga nakakomisyon usab siya gikan sa mga kontraktor.
Human mogawas ang C-5 Project, wala na makabawi si Villar.
Apan bisan dili na makabawi ang pagtibugsok sa iyang popularidad, angayan gihapon nga pasabton ni Binay ang mga Pilipino kun giunsa niya pagpabarug ang iyang mga bahandi bisan sa iyang ka-pordoy human sa 1986 Edsa revolution kanus-a siya nagsugod pagka-mayor sa Makati.
- Latest