Kinsay angay mabasol?

Adunay balana nga mitumaw sa relasyon tali sa mga dakbayan sa Sugbo ug Mandaue tungod niini’ng walay klaro nga pagdumala sa Mahiga Creek, kansang matag tampi gipanag-iya sa kada usa ka siyudad.

Nagsugod kini sa diha’ng mireklamo si Mandaue City Mayor Jonas Cortes sa iya nga giingo’ng pagbasol sa dakbayan sa Sugbo sa iya’ng siyudad tungod sa problema sa pagbaha sa habig sa Sugbo diha sa mao’ng creek.

Aron lagi pagsulbad sa mao’ng problema, adunay aksiyon nga limpiyohan ang Mahiga gikan sa mga estraktura sa mga informal settlers. Hinuon nagkauyon ang duha ka local government unit sa mao nga lakang.

Lakip sa paglimpiyo diha sa creek mao ang pag-demolis sa mga footbridge nga, matud pa sa mga opisyal sa siyudad sa Sugbo, makababag inig taas sa tubig nga moresulta usab sa pag-awas niini ug pagbaha sa uba’ng lugar.

Apan milubad ang dagan sa kooperasyon tali sa duha ka siyudad. Mirebenta ang Mandaue City niini’ng mora og pangapura sa dakbayan sa Sugbo.

Gani, gikataho nga nangayo og igo nga panahon ang kadagkoan sa Mandaue City alang sa pagpatuman sa demolisyon sa ila’ng side. Ug karon mipiyait si Mayor Cortes sa matud pa pagbasol sa dakbayan sa Sugbo sa iya’ng siyudad nga maoy hinungdan kuno sa pagbaha tungod sa problema diha sa Mahiga Creek nga hangtod karon wala gyuy kasulbaran.

Hinuon abtik usab nga mihimakak si Cebu City Mayor Michael Rama niini. Wala kuno siya’y gibasol niini’ng mao nga problema. Matud niya nga walay gubot taliwala sa dakbayan sa Sugbo ug siyudad sa Mandaue ug ambot kuno kun kinsay nangaway ni Mayor Cortes.

Niini’ng dili maayo nga kalamboan, siguro kulang sa negosasyon ang mga opisyal sa duha ka siyudad aron pagsulbad sa problema sa Mahiga. Kooperasyon maoy gikinahanglan aron pagsulbad niini’ng dako nga problema sa pagbaha.

Kay kun magpagoryo-goryo na lamang kini’ng duha ka dakbayan, mosamot na hinuon kini’ng mao nga gubot. Tungod niini, padayon usab ang mga pagbaha sa mao’ng dapit nga kanunay nga naghasol sa katawhan.

Ug kinsay ato’ng mabasol niini? Sila mismo tungod sa kakulang nila sa kooperasyon pagsulbad sa mao nga problema.