EDITORYAL - Dako’ng hagit sa DTI

Pagkanindot paminawon nga gimando sa Department of Trade and Industry (DTI) ang gitawag og “price freeze” nga sa ato pa gipugngan ang mga magpapatigayon sa pagpausbaw sa presyo sa mga baligya nila nga nag-una’ng panginahanglanon diha sa kabalayan.

Kabahin kini sa pagdeklarar sa Cebu City Council sa kinatibuk-ang dakbayan sa Sugbo nga “State of Calamity” tungod kay naigo man kita sa pagbaha sa milabay’ng pipila ka semana.

Apan maisip lang gihapon nga kutob ra sa pasiatab ang kadagkoan sa DTI kay dili man sila mosuroy sa lainlaing kamerkadohan ug sa mga department store aron panid-an kun kinsa sa mga magpapatigayon ang miabuso.

Pananglit misuroy man gani ang mga kawani sa DTI aron nga mahibaw-an nila kun kinsa kadto’ng mga magpapatigayon nga mipahimulos sa higayon, wala usab sila’y gihimo.

Ang mga opisyal sa DTI mipahibalo nga gidid-an ang mga magpapatigayon sa pagpaumento sa presyo sa gibaligya nila nga itlog sa manok, karne sa baboy ug baka, bugas humay ug mais, karne sa manok, abot sa kaumahan, asukar, isda ug buwad.

Apil usab nga wala itugot ang pagpausbaw sa presyo sa mga sabon, processed milk, coffee, pan ug sabon panglaba.

Mas musamot nga mopagakpak ang katawhan ug modayeg sa kadagkoan sa DTI kun aduna g’yud sila’y mga magpapatigayon nga masakpan ug masilotan tungod sa pagpahimulos pinaagi sa pagpausbaw sa presyo sa ilang mga baligya.