Isyu ni Binay nagkanindot

Pastilan, kun mag-obserbar ka sa isyu nga naglambigit karon ni Vice President Jejomar Binay dili ka makapugong sa pagpanglingo-lingo ug kun nakabotar ka man niya, sigurado ko nga nagmahay ka.

Apan bilib ko’ng Mayor Michael Rama kay bisan pa man sa mga kalamboan sa nagpadayong imbestigasyon sa Senate Blue Ribbon Committee, wala mausab ang iyang pagsalig.

Gideklarar ni Vice President Binay nga aduna lang siya’y kapin sa P60 milyones nga net worth sa iyang katigayonan. Daghan ang wala g’yud motuo niini kay kun tinuod nga may elevator ang balay ni Binay, sa ato pa subra kini sa upat ka andana.

Unya kay anaa man sa Makati City ang iyang balay, ang yuta pa lang niini puwerte na ka mahal. Ang balay, pila kaha ang kantidad? Unya ang iyang katigayonan pa? Motuo ka nga miabot lang og P60 bilyones.

Gitan-aw karon sa mga senador ang katinuoran sa report nga si Binay migamit og “dummies” aron dili mahibaw-an sa publiko ang iyang uban nga katigayonan.

Angay’ng tubagon ni Binay ang gibutyag nga kasayuran nga kasosyo siya sa Omni Security Investigation and General Services nga maoy nagmonopoliya sa guwardiya ug mga janitor sa Makati City Hall ug uban pa nga pribado’ng kompaniya.

Ang katawhan angay gayud nga pasabton ni Binay niini nga isyu kay law-ay kaayo nga ang Makati atol sa iyang pagdumala, ug bisan karon nga gidumala kini sa iyang anak, magkuha og mga guwardiya gikan sa iyang ahensya?

Kana kun tuohan nato nga si Vice President Binay maoy usa sa mga tag-iya sa Omni Security Agency.

Ang report nagkanayon nga si Binay mao usab ang tag-iya sa New Meriras Development Corporation nga ang yuta may gidak-on nga 8,877 square meters sa Makati.

Gisuta karon sa Senado ang report nga kining yutaa gipanag-iya ni kaniadto sa 525th Army Engineering Batallion apan gikombinsir sa mga bata-bata ni Binay ang kasundalohan nga bahinon nila kay ang Makati City mopatukod og mga balay alang sa mga kabus.

Apan ambot og naunsa nga nahipunta na man hinuon sa New Meriras nga matud pa apil si Binay sa tag-iya. Na hala, paabuton nato ang kalamboan niining mao nga isyu.

Nagpakahilom lang ko niini nga isyu sa nanglabay nga mga adlaw samtang naniid sa kalamboan sa imbestigasyon sa Senate Blue Ribbon Committee.

Kun ang Senado makakuha og lig-on nga basihanan batok kang Vice President Binay unya si Mayor Rama padayon nga misuporta kaniya, tan-aw nako nga dili maayo ang kaugmaon ni Rama sa eleksyon sa 2016.