Trapiko sa Minglanilla

Nabalaka ang mga dumadapig ni Bise Presidente Jejomar Binay nga mulampos ang tinguha sa kaaway niini sa politika nga mosawom ang popularity rating niini sa dili pa mapupos ning tuiga 2014.

Ang kampo sa bise presidente nakamatikod na nga mikunhod ang rating ni Binay nunot sa kontrobersiyal nga Makati City parking building nga nagkantidad og P2 bilyones, nga matud sa mga testigos sa Senate inquiry nga “overpriced” kaayo ug nakasapi niini ang pamilya sa bise presidente.

Tinuod man nga politika ang tumong niining paggukod nilang Senador Alan Peter Cayetano ug Antonio Trillanes kang Binay. Ingon man gyud niini ang sangpotan sa politiko nga mag-ambisyon og taas nga puwesto, kuhiton g’yud sa wala’g tuo nga mga isyu.

Apan bisan unsa ka politika ang tuyo sa imbestigasyon, angayan gihapon kining tubagon ni Binay ug sa iyang pamilya tungod kay naglambigit kini og buhat nga mahimong kapasikaran sa kasong kriminal nga kun mamatud-an magtukmod kanila sa mabugnaw’ng selda de rehas.

* * *

Makit-an ang paninguha sa lungsod sa Minglanilla pagsulbad sa suliran sa trapiko sa south national highway tungod sa pagdaghan sa mga sakop sa Mitcom.

Daghan ang nakadayeg sa presensiya sa mga unipormadong mga traffic enforcers sa highway.

Ang karaang merkado nga gitumbok nga usa sa mga hinungdan sa panaghuot sa trapiko sa Minglanilla gibakantehan na sa mga vendors nga tua na magtikawtikaw sa bag-ong merkado, mga tunga sa kilometro ang gilay-on gikan sa daan nga tianggehan. Apan aduna koy obserbasyon nga angayang ikonsiderar sa Traffic Commission sa Minglanilla:

Una, ang mga interior nga bahin nga mga barangay walay klaro nga traffic policy nga nakadulot og panaghuot sa trapiko sa highway.

Pananglit sa eskina sa Upper Pakigne kanang karsada paingon sa Tubod, ang badlongong mga drayber og habal-habal ug traysikol anha manghunong, mo-parking ug mopik-ap og mga pasahero sa eskina. Laing sanglitanan ang eskina Kalubihan, ang mga traysikol nga wala gani rehistro gikan sa lungsod naa gyud magtamaan sa eskina. Ang resulta niini mao ang hinay nga agas sa trapiko paingon sa interior nga bahin busa momugna siya og pagka-stock-up sa highway.

Ikaduha, adunay mga traffic enforcer sa Mitcom nga dili kaayo mamadlong sa mga drayber og traysikol ug habalhabal nga magpabadlong pinaagi sa pagpamik-ap og pasahero sa mga lugar asa naghuot ang trapiko.

Ikatulo, kun walay designated loading/unloading area sa highway, bisan asa lang mohunong ang mga PUJ, ilabi na ang mga multicab nga hilabihan na kadaghan.

Ika-upat, adunay mga vulcanizing shop nga anaa sa highway.