EDITORYAL – Natul-id ba ang hiwi?

Tul-iron ang hiwi. Kini maoy balik-balikon kanunay pagsulti ni Mayor Michael Rama panahon nga pakighinabian siya sa mga reporters ug bisan na kun moatubang siya sa mga tawo ug mohimo’g diskurso.

Pagkanindot sa mao nga pulong. Nagpasabot kini nga kun adunay gihulagway niya nga hiwi nga binuhatan sa administrasyon sa kaatbang niya sa politika, dili na niya kini himuon.

Samtang natul-id sa mayor ang ubang hiwi nga binuhatan sama sa pagpahunong niya sa negosyo sa usa ka opisyal sa vendors group nga nanguwarta pagpaabang sa luna nga iya sa kagamhanan, dili patas ang pagpangisyu og sakyanan ngadto sa barangay.

Kun si kanhi mayor Tomas Osmeña adunay pagpinig sa pag-isyu og mga sakyanan atol sa iyang administrasyon, dili kini angay’ng sundon ni Mayor Rama tungod kay gipasiatab man niya ang iyang slogan nga tul-iron ang hiwi.

Daghang kapitan sa barangay dinhi sa dakbayan nga wala isyuhi og sakyanan nga magamit unta nila sa opisyal nila nga mga lakaw. Ang rason mao nga ang nahisgutang kapitan alyado sa Bando Osmeña Pundok-Kauswagan (BOPK).

Si Kapitan Gremar Barete sa Barangay Buhisan mireklamo na kay ang sakyanan nga para unta sa iyang barangay tua giisyu sa konsehal ug usahay makita nga ang kanhi kapitan nga dili na opisyal maoy magsakay-sakay. Tukma ba gud na?

Ang lista sa mga sakyanan nga gipanag-iya sa City Hall magtug-an kun kinsa nga mga opisyal nga suod sa administrasyon ni Mayor Rama nga giisyuhan og sobra sa usa ka sakyanan samtang ang ubang kapitan wala.   Kun ingon niini ang sitwasyon, wala diay tumana sa mayor nga tul-iron niya ang hiwi?