Mr Barangay

Brgy Bagay, Daan Bantayan, Cebu

“Sir maayo unta’g madakpan ning drug dealer diri sa Bandilaan kay nagkadaghan na kaayo ni sila diri luoy kaayo mga bata kay miapil na sad, among mga opisyal wala man pakabana.”

Brgy Langud, Argao, Cebu

“Patabang unya mi bahin diri sa among karsada kay grabe na kaayo ang libaong maglisod na og agi ang mga sakyanan mura’g nakalimtan na man lang ni sa mga opisyal namo sa barangay nga problema nga dugay na man unta ni.”

Brgy Lamintak Norte, Medellin, Cebu

“Pasalamat gyud mi Sir nga milihok na ang mga polis kay gironda na gyud nila diri ang tigpayuhot sa ilegal nga drugas gani naa pay namatay pero ang nakapait kay ang druglord diri pabilin pang gawasnon hangtod karon balik na sad ang pamaligya’g shabu diri.”

Brgy Pit-Os, Cebu City

“Sir nganong wala man tawon ni dakpa ang druglord diri sa among lugar nga unta dugay na man ni siyang nalambigit ani pero hangtod karon wala may nakaako pagdakop aning tawhana nga ilado man ni diri sa among lugar.”

Brgy Hagnaya, San Remegio, Cebu

“Maayo unta’g isunod sa mga polis pagronda ning naggunit gyud aning shabu Sir kay plastada ra kaayo dili man maikog sa mga silingan hawod kaayo kay naa daw siya’y protektor nga polis maong dili siya dakpon.”

Brgy Calape, Daan Bantayan, Cebu

“Sir ngano man ning among mayor wala may gihimo nga usa ka tuig na lang wala man gyud mi kadawat og tabang nga mga biktima sa bagyong Yolanda naay nanguha’g hulagway diri nga grupo kay manghatag materyales pero hangtod karon wa may niabot.”

Brgy Lawaan Iii, Talisay City

“Naunsa na man ning among lugar Sir nagsige na man lang ang kawat diri, naa mi silingan nga tanod pero way gamit kay dili man mag roving mag-estambay ra man unya tuyok kadiyot dayun tulog og dugay maong kawatan magpista pirmi.”

Brgy Malalay, Ronda, Cebu

“Sir magpatabang unta mi nimo kay kaning hapit kinatibuk-an sa among lugar kay nangliki man ning yuta kuyawan na man mi basin maparehas na unya mi ani sa Guinsaogon, Southern Leyte nga nag mudslide.”

Brgy Basak, Lapu-Lapu City

“Sir tinuod gyud nang ubang mga maestra mamaligya sa classrooms kay diri sa among lugar sa eskwelahan namaligya sad ubang maestra sa ilang classrooms naa gani ang estudyante maoy pabantayon sa anak didto sa ilang balay.”

Brgy Pilipog, Cordova, Cebu

“Patabang unta mi nimo Sir sa dalan diri sa among lungsod kay wala pa man gyud tiwasa’g trabaho labi na ning pagtaod sa culvert daghan na gyud kaayo nahasol ani nga mga motorista kay hinay kaayo ang trabaho.”

Brgy Talavera, Toledo City

“Hangyo unta mi’g tabang Sir nga mahunong ning harag videokee kay bisag lawom na kaayong gabii kusog kaayo ilang sounds bisag gibadlong na sa tanod sige man lang gihapon.”

Alang sa inyong reklamo text lang 09071678643