Malipayon nga pagsaulog!

Una nga adlaw karon sa ato nga pagsaulog sa tinuig nga Press Freedom Week. Sama sa naandan, magtigom na usab ang mga sakop sa medya dinhi alang sa usa ka martsa pagpasidaan sa mga Sugboanon sa kamahinungdanon sa kagawasan sa pamamahayag.

Sulod sa usa ka semana, nagkalainlain nga mga programa ang ipahigayon matag adlaw nga gitumong pagtabang sa lokal nga mga mamahayag. Kini aron usab nga mapalambo ang industriya sa medya dinhi sa Sugbo. 

Gani, nahimo na nga modelo ang Sugbo sa nasud kun ang pagpanalipod sa press freedom ang hisgotan. Napamatud-an na kini kaniadto’ng panahon pa sa martial law diin ang mga mamahayag sa Sugbo maoy usa sa mga maisugon nga miparang sa diktador.   

Dili sama didto sa kaulohan diin ang baba sa daghan sa mga mamahayag ang gibaatan sa rehime’ng Marcos sulod halos sa duha ka dekada. Panahon kadto sa pagkahanaw sa demokrasya sa nasud. 

Ug tungod lagi sa kahiusahan sa mga mamahayag dinhi, sayon lamang ang kurom aron isaulog ang kagawasan sa medya sa nasud. Hangtud karon, dako nga garbo alang kanato ang kalampusan sa kasaulogan sa Press Freedom Week.

Nagpasabot lamang kini nga solido ang medya dinhi sa Sugbo. Bisan pa sa daghan nga hulga sa propesyon, padayon nga wala mahadlok ang lokal nga industriya sa medya alang sa pagpadayag sa kamatuoran.

Apan padayon ang risgo sa propesyon. Sa uban nga dapit sa nasud, padayon ang mga pagpangatake batok sa mga sakop sa medya nga maoy naghatag og dautan nga imahe sa nasud isip usa sa mga lugar diin grabe ang hulga sa mga mamahayag.

Karon nga tuiga lamang, pipila sa mga mamahayag ang gipatay sa nagkalainlaing lugar sa nasud. Ug dili lamang dinhi sa Pilipinas. Siguro nakahibalo na kita mahitungod sa mga journalist nga gipangpunggotan sa ulo sa mga terorista didto sa Iraq dili pa lamang dugay.

Dako gayud nga hagit alang sa industriya ang padayon nato nga pagpanalipod sa ato nga kagawasan isip mga mensahero sa katawhan. Bisan pa man sa mga risgo nga kanunay mohapak sa propesyon, ania gihapon kita nakigbisog ug nagsaulog sa ato nga pagkagawasnon.

Malipayon nga pagsaulog sa Press Freedom Week!