Palpak sa siguridad

Alang sa siguridad, importante gayud ang pagbutang og closed-circuit television (CCTV) sa mga balay patigayon. Kaniadto, kasagaran sa nagtiner niini mga dagko’ng establisemento sama sa mga bangko. Apan karon, tungod lagi sa dako nga panginahanglan alang sa dugang siguridad gumikan sa nagsaka’ng kaso sa mga krimen, naandan na sa ubang mga establisemento ang pag-install og CCTV.

Gani, nahimo na kini nga palisiya sa ubang mga local government unit, sama sa dakbayan sa Sugbo, ngadto sa mga magpapatigayon isip usa sa mga paagi paglig-on sa siguridad.       

Apan adunay pipila ka establisemento ang wala gihapon mosanong niini. Ug ang nakadugang sa risgo mao ang pagkawalay security guard sa uban, hinungdan nga dali lamang sila nga mabiktima sa mga tulisan.

Ang nahitabo nga pagtulis sa pipila ka branch sa LBC sa dakbayan nagpakita lamang sa dako’ng kumpiyansa sa pipila ka establisemento. Hinaut nga magsilbi kini nga panaminan sa uban.

Hinuon, dili lamang ang pribado nga mga establisemento ang nagkulang sa ila’ng siguridad. Adunay dagha’ng buhatan sa kagamhanan ang palpak usab sa pagpakusog sa ila’ng siguridad.

Gani nauso karon ang pagpanglungkab sa mga munisipyo sa lalawigan sa Sugbo sa nakalabay’ng mga semana. Sa pagpangransak sa mga municipal hall sa Compostela, Carmen, Sogod ug Pinamungajan ug sa City Hall sa Toledo, napamatud-an nga nagkulang gayud ang mao’ng mga establisemento sa CCTV.   

Hangtud karon, wala pay natino ang kapolisan nga mga suspek sa mao’ng mga insedente. Kini gumikan usab sa kakulang sa mga ebidensiya nga nagpunting niadto’ng mga responsable, kinsa misakiyo sa dagko’ng kantidad sa salapi. 

Dako nga tamparos sa imahe sa kapolisan ang ila nga kapakyas pag-establisar sa identity sa mga suspek. Niini nga mga lungsod, duol lamang ang mga estasyonan sa pulis sa municipal hall. 

Karon panawagan sa otoridad ngadto sa mga lokal nga kagamhanan ning probinsiya ang pag-instalar og mga CCTV sa ila’ng mga munisipyo ug City Hall aron pagpakgang sa mga pagpanglungkab.

Kon si kinsay nagsurikbot niadto’ng mga salapi, kahibalo gayud mosuhid sulod sa mao’ng mga munisipyo ug City Hall. Posible usab nga inside job kadto’ng mga insidente. Apan ang kakulang sa ebidensiya mora’g maghatag usab og labad sa ulo sa mga imbestigador.