Palapad sa kadalanan sa South nasakripisyo

Gilaay na si Kongresista Samsam Gullas sa pagpinaabot kanus-a mahuman ang panaglalis tali sa mga environmentalista nga gipanguluhan ni Fr. Robert Reyes ug sa mga opisyal sa lokal nga kagamhanan sa unang distrito sa lalawigan sa Sugbo, mibahad kini nga i-realign na lang ang pundo alang sa road widening sa distrito paingon sa habagatan ngadto sa laing proyekto.

Nahadlok ang batan-on nga kongresista sa unang distrito sa Sugbo nga ma-revert balik sa panudlanan sa kagamhanang nasyonal ang P1 bilyon alang sa road widening kon dili kini magamit dayon.

Unsaon man tuod paggamit sa maong pundo kon ang pagpamutol sa mga karaang kahoy sa South national highway dili gyud mahimo ug dili matugotan sa Department of Environment and Natural Resources tungod sa hugot nga pagsupak sa mga environmentalista.

Ambot sad gyud og unsay naa sa hunahuna ni Fr. Reyes ug mga kaubanan nga dili man gyud niya ipaputol ang mga kahoy nga aduna na man untay mga insidente nga nakadaot sa kinabuhi ug kabtangan tungod sa pagkatumba sa mga karaan nang mga kahoy.

Kanang giingon ni Fr. Reyes nga adunay eksperto (iya ra usab nga kauban sa raket) nga nagkanayon nga mahimo ra nga operahan ang mga karaang kahoy, kaduhaduhaan usab na. Kay ang tawo bitaw nga mag-agi og operasyon duha ra man usab ang mahimong mahitabo, kon maayo mabuhi, apan kon dili maayo, matigok man gyud, unsa na kaha nang mga kahoy nga mas tigulang pa og edad sa akong lolo ug lola.

Si Kongresista Gullas nagkanayon nga kon dili gyud mahinayon ang road widening tungod sa pagsupaksupak sa mga environmentalista, iya na lang gamiton pagsulbad sa landslide sa Barangay Manipis asa naglagbas ang “Tabunok-Manipis Road” paingon sa dakbayan sa Toledo. Ipalit na lang kini og mga nets nga ipamutang sa mga bungtod ug pangpang kilid sa karsada aron maalihan ang mga bato ug yuta nga modahili.

Kay kon dili magamit ang maong pundo, mapunta kini sa kaban sa kagamhanang nasyonal, kuyaw pa makawat pinaagi sa giingon nilang “savings” o ang kontrobersiyal nga Disbursement Acceleration Program (DAP).

Si Arsobispo Jose Palma human na moluwat og pamahayag kabahin sa maong isyu. Iyang gipaluyohan ang pagpamutol sa mga kahoy’ng karaan. Mas gihimug-atan ni Palma ang kabililhon sa kinabuhi sa tawo nungka sa kabililhon sa mga karaang kakahoyan.

Alang kanako, mas maayong motikang kita paingon sa unahan. Ang kahoy adunay iyang kaugalingong lugar sa kalasangan ug kabukiran. Kon dili isakripisyo ang kakahoyan nga wala sa husto niyang lugar, ang kaugmaon sa tanan ang masakripisyo.

Adunay giingon nga kon gusto ka nga motubo ang usa ka tanom, imo kining putlon.