EDITORYAL - Motuman kaha ang mayor?

Ingon sa naanad na ang publiko, apil na ang mga kawani sa kagamhanan, nga ang Commission on Audit (COA) kanunay g’yud moisyu og mga Notices of Disallowance apan maisip ra nga wala’y kapuslanan.

Ang Notices of Disallowance nagpasabot nga namatud-an sa COA nga wala’y basihanan ang paggamit sa kuwarta sa kagamhanan alang sa usa ka gastohan.

Kon adunay Notice of Disallowance nagpasabot nga ang mga opisyal nga nagtugot alang sa mao nga gasto maoy manubag ug kinahanglan nga ulian nila ang kagamhanan sa mao nga kantidad.

Kini maoy mahitabo sa P87 milyones nga gigasto sa administrasyon ni Mayor Michael Rama human uyoni sa kinabag-ang sakop sa Cebu City Council ug gipanghatag sa mga kawani sa City Hall bali’g P10 mil matag usa kanila.

Gipatuo nila nga “calamity financial assistance” ang mao nga salapi bisan og ang mga kawani sa City Hall wala makasinati og kadaut sa linog ug sa bagyo’ng Yolanda kaniadtong miaging tuig.

Giandam na karon sa COA ang dokumento nga mosuporta sa Notices of Disallowance nga ilang i-isyu pipila ka adlaw gikan karon apan ang mga kawani sa City Hall wala kaayo mabalaka.

Ilang nahuna-huna nga makadaghan na nga ang COA mi-isyu og Notices of Disallowance apan wala man ipatuman sa mga opisyal. Ipatuman kaha ni Mayor Rama ang rekomendasyon sa COA nga pabayron pagbalik sa tag P10 mil ang mga kawani?

Kon dili tumanon ni Mayor Rama ang rekomendasyon sa COA ikiha ba gud siya sa Commission on Audit? Ang tubag dili.