Mabalhinon nga panahon

Tingali nakamatikod na kita, nga bias nang atong eksperto sa pagmonitor sa panahon, nga mao ang PAG-ASA, mora’g mawad-an na og paglaum. Sa pagtino sa ilang pangagpas sa paghulagway sa aktuwal nga mahitabo sa panahon, kon mosulod na kini sa atong nasud. Busa maghimo na lang sila’g pagbanabana sa reports, mao’ng usahay di gyud malikayan mosipyat gihapon.

Tungod tingali sa kakulangan sa modernong kahimanan, maoy nakaingon nga wala makahatag og tukmang balita. Apan ang daku gyung kamatuoran ini, ngano ug unsa gyu’y hinungdan–kini mao ang mabalhinon nga panahon. Nganong naingon man usab niini ang atong panahon. Sumala sa mga eksperto, nabuslot na kuno ang proteksyon sa kalibutan.

Nga mao ang ozone’s layer, nga nagsanta sa hilabihang kainit gikan sa adlaw. Nag-umido sa .01 kada tuig ang temperature sa kainit. Kini ang epekto nga nagusbat ang normal natong panahon. Nga bisa’g tag-init ang panahon, makasinati kita’g pag-ulan ug katugnaw. Kay nangahilis ang mga bukid nga sa dugay panahon, nabagtok kini sa yelo (iceberg) ug nisaka ang lebel sa tubig.

Daghan kini’g epekto sa atong kalikopan. Nahuyang ang yuta nga nangatumpag sa pagbaha ug paglinog sa lainlaing dapit sa kalibutan. Mga kalamidad nga dili na kini nato katingad-an. Dugay na kining gitagna sa kahitas-an, aron unta kita makapangandam sa mga katalagman. Nga karon nahitabo na sa atong panahon. Kay wala kita manumbaling sa mga pasidaan.

Nalingaw na pag-ayo sa pagtutok sa yutan-ong kalipay, nga may kinutoban.