EDITORYAL - Nameligrong kagawasan

Buot himuong kriminal nga buhat ang pagkuha og litrato o video ni bisan kinsang tawo ilabi na kung pribado. Matud pa nga dunay mga mireklamo kabahin niining pagpataka og kuha og videos sa mga cellphone cameras nga gipang-upload sa internet.

Moderno na ang panahon karon ug magkinahanglan na og bag-ong mga balaod nga pahaom sa kausaban, apan kinahanglan pa ba g’yud mohimo og lain na usab nga balaod alang niini?

Dunay daghang balaod ang Pilipinas nga nagdili sa pagpanghilabot sa mga pribadong bahin sa usa ka  indibidwal kay nalapas ang mga katungod sa hingtungdan. Duna usab ang Anti-Cyber Crime Law nga pahaom sa mga mahiligon na sa internet.

Apan nganong kinahanglan pa gyung mohimo og linaing balaod aron magdili lang niining pagkuha og videos sa mga ordinaryong tawo sa mga pangpublikong lugar?

Nagpasabot ba kini nga gidid-an na nila ang mga yanong Juan o Maria nga mo-expose sa mga kahiwian nga ilang makita. Kini ang hinungdan nga wa g’yud aprubahi ang Freedom of Information Bill?

Dali kaayo nga mipakita og suporta ang pipila ka mga magbabalaod kalabot niining giduso nga balaudnon. Mga magbabalaod nga may dautang plano sa umaabot nga panahon, kay basin dunay videos nga magamit batok kanila, maayo na lang kay dili dawaton sa korte.

Pila na man ka balaod ang wala na maamendahi ug wala na ma-repeal bisan tataw na kaayo nga wa na kini mapahimusli sa kadaghanan?

Gani ang maong mga balaod nagamit pang proteksyon sa mga abusado ug mga hakog nga magbabalaod ug mga impluwensyadong tawo aron tumban ang mga kabus nga mga Filipino.