Kon dunay baha

Baha diri, baha didto. Mao na ang atong nasinati sa milabay’ng mga adlaw diin nasanapan sa tubig ang pipila ka dagkong dalan sa Metro Cebu.

Gani daghan ang panimalay ug business establishments ang nahasol sa maong baha gumikan sa kusog nga pagbunok sa ulan.

Unsa may posibleng mahitabo ug unsa  man ang angayan natong buhaton kon masudlan og tubig baha ang atong panimalay o ba kaha establisemento?

Una sa tanan, kon masudlan gani sa tubig baha ang atong panimalay, dunay dakong posibilidad nga mabasa ang mga outlet ug atong mga dekuryenteng appliances. Mao gani ang rason nga mas labing maayo nga ang atong outlet taas-taas g’yud aron dili kini dali’ng mahumod.

Apan kon nabasa na kini, ayaw g’yud dayon ninyo gamita kini pinaagi sa pagsaksak sa mga appliances kay delikado nga makamugna kini og short circuit. Mas labing maayo nga atong paaboton nga mauga kini unya pa nato gamiton. Kon pananglitan mabasa ang atong mga electrical appliances dili g’yud kini safe nga gamiton. Mas maayo nga ato una kining ipa- check og technician kay kon inyo kining ipugos pagamit nga miagi kini pagkabasa peligro kini sa sunog.

Aron luwas kita sa posibleng pagka kuryente panahon sa baha, mas labing maayo og  atong palungon ang circuit breaker.  Kon may panginahanglan, tawag sa 160 – fire department.

Karong panahona nga nagsige ug bunok ang uwan ug angayan nga magmabinantayon ug mangandam kita kanunay aron mamahimong luwas ang tanang sakop sa panimalay.

* * *

Sa kataposan, advance happy birthday sa akong pinangga nga inahan - Mrs. Dinah Villanueva nga mag-celebrate sa iyang adlaw’ng natawhan karong September 1 puhon. Happy Birthday Ma!