Leksiyon sa polis

Patay ang hepe sa kapolisan sa lungsod sa Alcoy sa lalawigan sa Sugbo human pusila sa kanhi polis ug konsehal sa barangay Poblacion sa nahisgotang lungsod.

Ang krimin nahitabo samtang ang mga polis sa lungsod nagbantay sa gipahigayong boksing nga kabahin sa pagsaulog sa fiesta sa lungsod. Ang mga nakasaksi sa krimin miingon nga nakainom ang hepe ug nagpusil kaniya.

Ang paghugoy-hugoy sa mga polis sa probinsiya sa mga sibilyan dili bag-o nato tungod kay mao na gayod kini ang naandan. Kasagaran kanila makig-inom ngadto sa katawhan bisan sa mga panahon nga sila naka-duty. Gani ang uban kanila wala’y kaikog sa ilang gisul-ob nga uniporme samtang naghupot sa baso nga may sulod nga ilimnong makahubog. Mao kini ang nahitabo sa hepe sa kapolisan sa lungsod sa Alcoy sa lalawigan sa Sugbo. Nakainom samtang nag-duty.

Mao kini ang suliran sa kadagkoan sa atong kapolisan kon unsaon pagwagtang ang kakulang sa disiplina sa mga sakop niini nga layo sa ilang pagtan-aw o supervision. Ang mga polis sa lalawigan nagsalig nga panagsa ra silang duawon sa ilang mga labaw busa ilang gibati ang pagkagawasnon sa ilang gihimo bisan pa kun kini nakalapas na sa ilang code of discipline.

Ang pagpusil patay sa hepe sa kapolisan sa lungsod sa Alcoy laing kaso sa pagpahigmata sa ilang kadagkoan nga nakalimot sa pagpahinumdom sa ilang ginsakpan sa pagpabilin sa pagtamod sa ilang code of discipline seguro tungod usab sa kadaghan na sa ilang mga gimbuhaton. Apan bisan pa man sa kadaghan sa ilang gimbuhaton dili unta nila kalimtan sa pagpahinumdom ang ilang ginsakpan sa pagka- modelo sa katawhan.