EDITORYAL - Cha-cha na

Nagsugod na ang mga kalihokan kabahin sa planong Charter Change nga ang tumong mao ang pag-amendar sa mga economic provisions sa kasamtangang balaod. Partikular sa buot amendahon ug gustong padugangan ni House Speaker Feliciano Belmonte, ang author sa Resolutions of Both Houses No.1 (RBH 1), mao ang mga seksyon kabahin sa ‘national economy and patrimony,’  ‘educations, science and technology, arts, culture and sports’ ug ‘general provisions.’

Gusto sa RBH-1 nga pabutangan kini og “unless otherwise provided by law.” Mubo ra kaayo kini nga mga pulong apan dako og impact sa interpretasyon unya sa balaod kun moabot sa punto nga may mokwestyon niini. Dunay mga magbabalaod nga nabalakang dili unya mamahimong pabor sa gobiyerno ilabi na sa mga Filipino ang sangputanan kun ang mga langyaw mahatagan og siyento porsiyentong ownership sa mga kompanya ug mga luna nga ilang gibubo-an og puhonan dinhi.

Sa pagkakaron, kinahanglang 60 porsiyento sa mga nanag-iya sa mga kompanya nga nag-negosyo dinhi sa nasud gipanag-iya og mga Filipino.

Nagpasabot kini nga ang mga foreign investors nga gustong mag-invest dinhi kinahanglang mangita pa og Filipino partner una pa sila maka-negosyo nganhi.

Apan dunay dili maayong epekto ang maong sistema kay matud pa dunay mga pagukon-ukon sa foreign investors aron mamuhonan dinhi.

Hinuon giklaro ni Davao City Rep. Mylene Garcia-Albano, tsirman sa committee on amendments nga bisan mauyonan ug maratipikahan ang pag-uyon sa amendments, magpabilin ang constitutional restrictions sa mga langyaw’ng investors hangtud nga way balaod nga magtangtang sa maong restrictions.

Ang maayong imprastraktura, masaligan nga energy supply, lig-ong political atmosphere, seguridad ug labaw sa tanan dili kaayo mahal ang operational cost ug mga buhis paigo na aron maagni ang mga investors.