Tuboy ni Noynoy

Daghan ug sunudsunod ra kaayo ang makapatay-og nga mga pamahayag ni Presidente Noynoy Aquino sukad gibasura sa Korte Suprema ang Disbursement Acceleration Program (DAP), nagkapuliki gani ang iyang mga tigpamaba sa pagsunod pagpasabot, nga di kalikayan ang pagtumaw sa kalibog kon nasuko, nanghudlat, nipasidaan, manimawos, o nanungog ba lang siya:

Gipasidan-an niya ang labaw’ng hukmanan nga mahimong magkabangga na sab sa Malakanyang nga kinahanglang magpataliwa na sab ang Kongreso;

Giawhag ang iyang mga tigpaluyo sa pagsul-ob og yellow; ug

Human isalikway, giablihan nang iyang panghunahuna sa posibleng kausaban sa konstitusyon nga motugot sa paghupot niya og ikaduhang unom ka tuig nga termino hangtod sa 2022.

* * *

Human sa pasiunang kamasuk-anon sa Korte Suprema nikalma na si Aquino. Gihangop na lang ug wa na labtiki ang mga mahistrado atol sa iyang State of the Nation Address (SONA). Sama sa ubang napilde sa kaso, malinawon nga gipasaka sa iyang mga abogado ang motion for reconsideration (MR) sa kontrobersiya sa DAP.

Samtang nikagar ang kampanya pagpabaha og yellow sa tibuok nasud, nakakita si Aquino ug iyang mga alyado og bag-ong target: Ang Judiciary Development Fund (JDF) nga gihulagway nga pork barrel sa Korte Suprema. Ug may balaudnon nang napasaka nga nagtugot sa paggamit og savings alang sa DAP--klarong pagsuway pagbaraw sa posibleng pagbasura sa labaw’ng hukmanan sa MR aron mapadayon ang DAP.

* * *

Nahawongan hinuon ang kontrobersiya sa DAP sa kaandam ni Aquino pagpaminaw sa mga argumento sa pag-usab sa konstitusyon ug paglugway sa iyang termino. Mao bay nakit-an ni Aquino nga maoy mas kasaligang garantiya nga magpabilin ug magpadayon ang kausaban nga iyang nasugdan kay sa pagsugal nga iyang mga kaatbang nay magtungkawo sa Malakanyang sa 2016?

Andam ba gyong magpapili pag-usab o nanglawgaw lang sa mga mapangahason nga nangampanya nang daan sa piniliay nga duha pa ka tuig gikan karon? Nagpalutaw ba lang og kahigayonan o nakumbinser na gyong paghupot og lab-as nga termino ray hingpit nga makahipos sa iyang mga kaatbang?

* * *-

Kumbinsido kong mokanaog na si Aquino inigkapupos sa iyang termino sa udtong tutok sa Hunyo 30, 2016 ug iyang panalipdan ang batakang balaod nga gipanday sa pamunoan sa iyang inahan, si anhing Presidente Cory Aquino.

Ang pagsulbong sa suporta nga iyang nadawat human sa SONA nagmatuod nga di siya inutil sa nahibiling duha ka tuig sa iyang pamunoan. Bisan ang agresibong pagpangulitawo sa iyang suporta ni Bise Presidente Jejomar Binay nga gisagolan og abunda  nga maniobra, nagtimaan sa kamahinungdanon sa tingog ni Aquino sa umaabot nga piniliay’ng presidensiyal. Mahimong ang iyang paluyohan, bisan nangiwit o wa gyod mahisguti sa politikanhong surveys karon, maoy ituboy sa katawhang Pilipinhon pagbanos sa iyang pamunoan.  [email protected]