Senior Citizens Center sa Pardo

Gitug-anan ko ni Fe Bello, outgoing president sa El Pardo Senior Citizens Association, nga may kaugalingon sila nga center nga nahimutang sa lote sa banay ni Antonietta Fuentes sa Poblacion, Pardo ning dakbayan.

Natukod kini, bisan tuod og wa pa mahuman, gikan sa P300 mil nga donasyon sa mga sakop sa kanhi Pardo Youth Association nga atua na mamuyo gawas sa nasud. Ang kapunongan sa mga batan-on kaniadto na-coverted ngadto sa El Pardo Senior Citizens Association.

Si Ms. Fuentes maoy founder sa Pardo Youth Association ug gi-organize niya ang senior citizens association kauban nila ni Dr. Nick Maglasang ug Ven Navarro, kanhi opisyal sa DILG.

Magtigom sila matag ikaduha’ng Sabado sa bulan nga tambongan sa labaw sa katunga sa kapin sa 180 nila ka sakop. 

Ang monthly dues: P100 nga anhi kuhaa ang mga gasto pagpadagan sa kapunongan, ug laing P100 nga maoy kuhaan sa mortuary, medical aid, ug hospitalization sa mga sakop.

Ang bag-ong presidente, si Teresita Rabor, napili usab nga presidente sa Federation of Senior Citizens Associations of Poblacion Pardo.

Pipila sa ilang kalihokan naglangkob ning mosunod: pagsalmot sa Flores de Mayo; pakig-coordinate uban sa kapunongan sa Simbahan alang sa mga kaakohan ug gimbuhaton panahon sa pagsaulog sa fiesta; tinuig nga outing, cooking demonstration, actual nga pangluto ug tree planting.

Samtang sa laing bahin, si Fe napili usab nga board member sa bag-ong SCOOTER kun Senior Citizens Open Organization Towards Effective Reform, kauban pagkapili nila ni Dr. Nick Maglasang, Boy Antig, Flor Pesquera, Rey Mojica, Mary Aleonar, Ronnie Abejo, Flora Velez, Ester Jimenez, Doming Chavez, Carmen Gabucan, Cecille Olita, Agustin Barraca, Vita Padilla, Urbana Tejano.  

Ang bag-ong tahas sa SCOOTER mao ang pagpasiugda og mga kalihokan paghiusa sa nagkalainlaing pundok sa mga senior citizens ning dakbayan, ug pagpahigayon sa mga reforms aron mapadayon ang pagka-productive niini, ug makatampo gihapon pag-ugmad ug pagpalambo sa nasud. Alang sa SCOOTER, ang nation building kaakohan sa tanan.

Matud ni Dr. Maglasang, pangulo sa SCOOTER, nga kon maghugpong kita’ng tanan, atong makab-ot ang tingusbawan, dili lang sa dakbayan, kundili sa tibuok nasud.

ERRATUM: Sa atong miagi nga lindog pag-feature nato sa Sundowners in Action sa mga senior citizens sa Banilad pinangulohan ni Rene Aliño, nasayop kita pagpatik sa ngalan ni Pacifico Ouano Remedio, treasurer sa Sundowners. Our apologies. Si Pacifico, usa ka CPA, walay pulipuli pagka-treasurer sa ilang pundok sa mga senior citizens. Ang ilang pundo sa bangko P319 mil hangtod sa miaging Hunyo.