Dunay shabu lab dinhi?

May nadawat ko nga reklamo gikan sa usa ka lumolupyo sa Barangay La Paz, dakbayan sa Bogo kabahin sa dili makiangayon nga pagpanghatag og calamity assistance sa mga tawo nga giingong nabiktima sa bagyo’ng Yolanda.

Taga Sitio Bahi ang mireklamo, apan ang nakadaot kay talawan, dili magpaila sa iyang ngalan. Mihatag siya sa upat niya ka silingan nga nakadawat og ‘tag P30 mil nga hinabang gikan sa kagamhanan.

Ang iyang reklamo kon ngano nga ang upat ra niya ka silingan ang gihatagan nga guba man ‘sab ang iyang balay? Dili lang ‘sab nako ibutang ang mga ngalan sa giingong nakadawat kay wala man magpaila ang mireklamo.

Daghan kaayo ko’ng mga report nga madawat apan dili kaayo ko ganahan motagad kay sagad igo lang moingon nga daghang pusher sa ilang dapit. Kon pangutan-on sa ngalan, mohatag lang og angga.

* * *

Uy, kamong mga polis diha sa lungsod sa San Fernando, aksyoni ra ninyo kini’ng magsugal og hantak atubangan sa TCPI, dapit sa parking area sa mga sakyanan.

Pangdakpa na og pasakai’g kaso. Dili kuno mahadlok ang tigpasiugda niini’ng maong sugalan kay paryente sa mayor. Unsa, tinuod ni nga nangahadlok mo?

* * *

Gidayeg nako ang usa ka inpormer sa Renbor Patrol. Detalyado kaayo ang iyang detalyi nga nagbutyag sa ngalan sa mga polis nga matud niya nagproteher sa problema sa ilegal nga drugas.

Aw hinuon, dili pa g’yud ko makaingon nga A-1 ang mao nga inpormasyon apan basi sa detalyi sa inpormer, katuohan. Gawas sa mga polis, gibatbat pa niya ang kalihukan sa grupo.

Kun tuohan nato ang mao nga report, dili na lagi kasaligan ang kapolisan sa mao nga dakbayan kay tiaw mo, pipila sa iyang mga sakop protektor sa mga tigbaligya og drugas?

Apan natugaw ang akong pagkatulog niadto’ng Lunes sa gabii. Mitingog ang akong “message alert.” Usa ka inpormer nga nagpaila nga kanhi “confidential agent” sa polis ug mitug-an nga may shabu laboratory kuno dinhi sa dakbayan.

Tinuod ba ni taga PDEA? Nagduha-duha ko sa pagtuo niini nga inpormasyon kay ang iyang gitug-an anaa kuno sa usa ka ilado kaayo nga subdivision dinhi sa Sugbo ang shabu laboratory.

Karon pa ko makadungog sa mao nga report. Sayon ra man gud ang pagbuhat og report mao nga dili dayon kita motuo. Abi ninyo, duna ko’y pamaagi sa pag-counter sa mga report nga angayan nga aksyonan.

Hatag gani mo’g report kanang detalyado ‘sab aron ta ganahan mobasa.