Nahulog

Ang pagkahulog gikan sa taas nga nahimutangan timailhan sa usa ka anxiety dream. Mahimong ang hingtungdan anaa sa kahimtang sa ideyalismo nga tungod niini nahikalimtan niya o dili ba kaha wala niya hatagi og igong pagtagad ang reyalismo sa kinabuhi. Ang pagkahagbong, pahinumdom nga mas mahinungdanon kaayo ang pagkahimong andam og tagana nga motunob sa reyalidad sa kinabuhi kaysa molupad sa kapunaw-punawan sa mga ideya lamang apan walay gihimong tukmang lakang aron mahatagan kini og katumanan. Mapuslanon baya ang daydreaming kun tinguhaon lang gyud sa nagdamgo nga iyang buhaton ang mga lihok-sulbad alang niini. Sa laing bahin, ang pagkahulog gikan sa hataas nga nahimutangan ang mahimong pahinumdom nga ang kinabuhi dili hingpit ug nga ang pagkahagba ug paghisukamod usa ka dakong posibilidad.