Unsaon pag-usab sa apelyido

Dear Atty. Divine,

Duna ko’y anak sa pagkadalaga nga ang gigamit niini sa iyang birth certificate mao ang apelyido sa iyang amahan. Unom na ka tuig ang akong anak ug ang amahan wala na g’yud magpakita kanamo ug wala gani g’yud kini makahatag og financial assistance sa bata. Karon attorney plano unta nako nga ipausab ang apelyido sa akong anak, gikan sa apelyido sa iyang amahan ngadto na sa akong apelyido. Mahimo ba kini attorney? Unsa may maayo nako nga buhaton aron mausab ang iyang apelyido? Daghang salamat and more power. - Mae

Dear Mae,

Kon gusto nimo’ng ilisan ang apelyido sa imong anak kinahanglan g’yud kini nga moagi sa korte kay ang change of surname dili kini mahimo nga ipaagi lang sa Local Civil Registar  ang pag-usab sama sa pagkurihir sa ubang sayop nga entry sa Birth certificate mahitungod sa gender ug uban pa’ng sayop sa spelling nga anha ra usbon sa Civil Registrar. Kon ang usbon sa entry sa Birth Certificate nag-involve na gani og apelyido, nationality ug ang tuig sa adlaw’ng natawhan moagi na g’yud  na sa korte ang pag-usab niini. Busa ang maayo nimo’ng buhaton karon kon gusto g’yud ka nga usbon ang apelyido sa imong anak, mao ang pagdangop og abogado aron maoy motabang kanimo sa pagpasaka og Petition ngadto sa korte alang sa paghulip sa apelyido nga gigamit sa imong illegitimate nga anak ngadto na sa imong apelyido. Akong gilauman nga natubag ko ang imong pangutana. Thanks and God Bless. - Atty. Divine

Alang sa inyo’ng pangutana may kalabutan sa problema’ng legal, ipadangat lang ang inyong suwat sa Legal Corner sa V. Gullas Street, Cebu City or email sa [email protected] ug akong tubagon ang inyo’ng pangutana pinaagi sa akong column matag Miyerkules ug Domingo.