Arogante si PNoy

Gisugdan na sa mga kaalyado ni Pangulong Noynoy Aquino ang pagkonsulta sa katawhan alang sa posible nga pag-usab sa batakang balaud sa nasud aron mahatagan og ikaduha’ng termino ang presidente.

Tumong sa paghimo og Charter Change mao ang paghatag og lugway sa termino sa pangulo aron kuno mapadayon niini ang nasugdan niya nga reporma sa nasud.

Apan dili kini mao ang tinuod nga rason sa gitinguha nga ikaduha’ng termino sa pangulo. Dayag ug klaro kaayo nga gusto lang makabawos ang pangulo sa Korte Suprema nga mideklarar sa iyang Disbursement Acceleration Program (DAP) nga ilegal ug matud pa wala masubay sa batakang balaud.

Ang pangulo wala makadawat sa iyang kapildehan busa gusto niya’ng kuhaan ang gahom sa Korte Suprema nga matud pa niya miabuso sa gahom. Apan kinsa ba ang miabuso sa gahom, ang Korte Suprema o ang pangulo?

Ang hukom sa Korte Suprema “unanimous” sa ilang en banc nga session. Kon ang mga sakop sa Korte Suprema dili pa kombinsido sa pagka ilegal sa DAP dili gayod mahitabo nga magkahiusa sila sa ilang hukom ilabi na nga ang uban kanila mga tinudlo pa ni Pangulong Aquino.

Busa kon may miabuso ug arogante sa iyang gahom wala’y lain kundili si pangulong Noynoy Aquino.

Human bugal-bugali ni  Presidente Aquino ang Korte Suprema maoy gisunod niini ang batakang balaud busa akong giawhag ang katawhang Pilipinhon sa pagmabinantayon sa mga lihok sa pangulo aron dili kita mahitumpawak sa kaalautan.