Buotan nga kawani sa PAL

Akong gipasalamatan si Carlos Patalinghug, ang in-charge sa ground handling services sa Phl Airlines sa Mactan Cebu International Airport.

Pagtugpa nako niadtong Lunes sa hapon didto sa Mactan Airport akong nadiskobrehan nga wala na sa bag ang akong cellphone.

Katapusan nako nga nahinumdoman mao nga akong gipasok sa bulsa sa kilid nga bahin sa bag ang akong cellphone diha nga didto pa ako sa Ninoy Aquino International Airport Terminal 2 sa Metro Manila base sa advice sa mga airport guard.

Apan sa pagkuha nako sa bag pag-abot sa Mactan airport nawala na ang akong cellphone hinungdan nga gipahibawo nako si Mr. Patalinghug.

Sa samang higayon gikontak sa akong anak ug umagad ang akong number ug maayo kay gitubag kini sa taga NAIA.

Ako na lang unta nga ipahapit ang akong cellphone sa ako’ng anak nga molarga unta niadtong Martes sa hapon gikan sa Manila paingon sa Cebu.

Apan  gikontak ni  Mr. Patalinghug  ang nagkupot sa akong cellphone sa NAIA ug gihangyo  nga ipadala dayon kini nganhi sa Cebu.

Busa nadala kini sa biyahe sa pagka alas 7:30 sa gabii niadtong Lunes ug ako dayon kini nga  nakuha niadto’ng higayona.

Sublion nako ang pagpasalamat ni Sir Patalinghug kay kasaligan ka ug angay dayegon ang mga opisyal ug kawani sa PAL nga “honest” ug maalagaron sama kanimo ug niadto’ng nakakita mismo sa akong cellphone didto sa NAIA.

Sir, thanks to both of you. ([email protected])