Alas ni Noynoy
Nilampos si Presidente Noynoy Aquino paggamit sa ikalima niyang State of the Nation Address (SONA) pagpahinumdom sa tanang hingtungdan sa iyang giisip nga tinuod nga papel sa iyang hapit na manamilit nga pamunoan:
" Ang siyam ka tuig nga pamunoan nga iyang gipulihan gipasanginlan ug karon inanay nang napamatud-an nga labing kawatan;
" Tungod sa kadaghan sa mga suliran nga iyang napanunod niadtong 2010 way nagpaabot nga masulbad ang tanan sa iyang pamunoan sud lang sa unom ka tuig; ug
" Mapadayon lang ang kausaban nga iyang nasugdan kun mohukom ang katawhan nga ang labing takos ug labing ligdong nga liderato ang ilang pilion sa 2016.
* * *
Way nihulagway ni Presidente Aquino nga maoy labing takos sa mga nitanyag sa ilang kaugalingon pagpuli ni kanhi presidente Gloria Arroyo. Gawas nga siyay labing di andam paglusad sa iyang kandidatura, gituohan sab nga nikalit lang pagsulbong ang iyang popularidad tungod sa pagbangotan sa katawhan sa kamatayon sa iyang inahan, si kanhi presidente Cory Aquino.
Maong way nagpaabot sa kadagko sa kausaban nga gipasiugdahan ni Presidente Aquino sa iya nang pagbanos sa Malakanyang. Mapanagan-on ang unang pipila ka buwan sa iyang pamunoan. Apan karong nakabuylo na, nagdumili na sa pagpapugong. Di sa labing higpit niyang mga kaatbang. Ni sa Korte Suprema. Ni sa nagpusutpusot nga impeachment complaints.
* * *
Daghang kausaban ang ikapanghambog sa pamunoang Aquino sa niaging upat ka tuig nilang pagduma sa Malakanyang. Apan ang labing klarong ebidensiya sa kadako sa kalainan karon kun itandi sa nangaging mga pamunoan mao ang mga numero sa Department of Public Works and Highways (DPWH), nga gikaintapan nga usa sa labing kurakot nga buhatan sa nasudnong gobyerno:
" Nadoble ang balor ug gidaghanon sa infrastructure projects gikan sa kapin sa P200 bilyones sa wa pa si Aquino ngadto sa kapin sa P400 bilyones na karon; ug
" Bisan sa mas paspas nga pagpatuman sa mas daghang proyekto nakatigom og kapin sa P28 bilyones tungod sa pagwagtang sa mga binuang sa mga subasta.
* * *
Way makatulisok ni Aquino sa iyang pamahayag nga ang pagtalikod sa iyang katungdanan sama ra nga pagtalikod sa iyang mga ginikanan. Way makalalis sa talagsaong mga kabilin sa iyang mga ginikanan. Way makakuwestiyon sa iyang panumpa nga di mahitabong pakauwawan ang kamabayanihon nilang Ninoy ug Cory Aquino.
Ang wa isulti ni Aquino mao ang labing sipa nga mensahe sa iyang SONA. Di pa siya hingpit nga inutil bisan duha ka tuig na lay nahibilin sa iyang pamunoan ug bisan sa kasamtangang pagtibugsok sa iyang popularidad. Kay ang labing lig-ong garantiya nga magpadayon ang iyang gipasiugdahang kausaban lapas sa iyang termino sa 2016 maong pagpili og bag-ong pangu nga sama og baruganan, nga siya si Aquino ang labing epektibong makahashas.
- Latest
