Among pasalamat ngadtong Fr. Ian

Abi nako’g ang mga dagkong kompaniya ra ang may rotation (tuyok o binalhinay) sa destino. Hasta sab diay ang simbahan. Kay si Fr. Chris Ian de los Santos lang, kinsa wala pay usa ka tuig nga naasayin sa  Guadalupe Parish Church ning dakbayan sa Sugbo, mobalhinay na man ngadto sa St. Therese Parish Church, Lahug, Cebu City kang kansang kura paroko mao si Msgr. Roberto “Boy” Alesna.

Sumala pa ni Sis. Dulce Caseñas, coordinator sa Guadalupe Parish Lector’s Ministry, kun wala’y kakulian sa eskedyul, ang pagbalhin ni Fr. Ian ngadto sa nahisgotang simbahan ipahigayon sa Hulyo 28, 2014. Daghang parokyano ang natandog sa maong balita. Kay dili man gyud kalikayan nga may makat-on sa pagmahal ug paghigugma sa mga homily sa pari, kinsa nahimo nang duol sa kasingkasing sa mga suking manimbahay.

Matag Lunes sa alas 6:30 sa gabii ang misa, halos pirme ming magkauban si Fr. Ian. Siya ang officiating priest ug ako usab ang lector. Soft and mild siyang manulti, apan bug-at ug puno sa pagtulon-an ang mga pulong mga manggawas sa iyang pagwali. “Very approachable and friendly but so sharp.” Matud pa. Ug gumikan ning imong pagpugas og mga maayong binhi sa tabunok namong kasingkasing, Fr. Ian, diha sa imong pagpangalagad ning parokyano sa Guadalupe, kami nagpasalamat kanimo sa wala’y hunong mong pagsangyaw sa mga pulong sa Diyos nga mao ang among kaluwasan.

Laumi, nga amo ning ampingan, alimahan ug puy-an sa among inadlaw nga pagpakabuhi ning kalibotan.