Leksiyon sa impatso
Tungod sa grabe nakong yayay sa niaging weekend, wa ko magtuo nga makaabot dinhi. Dugay na kong gidapit sa mga tigpasiugda sa tigom ug nisanong dayon ko. Apan dihang na-inutil ko sud sa pila ka adlaw, gipasidan-an nako silang daan nga mahimong di ko tugotang makabiya sa Sugbo.
Maayo na lang kay ang labing nag-antos sa akong yayay nitambong og reunion. Ug ilang klase sa high school ang usa sa mga nanayaw. Maong sa niaging mga adlaw nalingaw sa ilang praktis. Nakalimot na sa dako nakong atraso dihang nisuway og pananghid nga moanhi. Apan tuguting asoyan tika sa dakong pandol sa akong kahimsog.
* * *
Haskang kaon nako sa niaging Biyernes. Kaduha ko namahaw, labihang taasa sa ikaduha nga nasumpay na lang sa paniudto. Taas kaayong gintang hangtod sa panihapon nga nabuylohan gyud ang mas dakong kaon hangtod sa dayong tungang gabii.
Nga mao nay kataposang tinuod nakong kaon sa nisunod nga upat ka adlaw. Bisan unsay akong imnon akong gisuka. Hapit matag takna nagbalik-balik sa pansayan. Wa ko motug-an ni bisan kinsa apan nakumbinser kong naluya na kay dihang naligo naglisod na pag-alsa sa tualya. Apan way malilong gikan sa akong asawa. Nakigsulti siyang Dr. Celine Aquino ug nagkasabot silang i-dextrose na ko.
* * *
Way bisan usa sa akong mga kasawo sa pamahaw, paniudto ug panihapon niadtong Biyernes ang gidaotan og tiyan. Unsa man diay nakapa-yayay nako? Nasobrahan ba lang gyud ang kaon? Na-aberiya ba lang kay gipakapinan pa gyud og inom?
Di na ko ganahang motagsa-tagsa sa tanang lamian nga putahe nga akong nakaon. Pasaligan hinuon tika nga, samtang ganahan kong mosuway sa labing talagsaong mga pagkaon, di ko magpataka og habhab sa bisan unsang ihukad. Gani, daghan kong gilaktawan niadtong adlawa. Pahibaw-on sab tika nga di ko gabok og tiyan. Pahinumdom ba lang ni nga nagkahinog nang akong pangedaron? Niabot na ba lang gyu’ng kinutoban sa lahutay sa akong ginhawaan?
* * *
Nakahukom ko nga, aron suwayan unsay madawat o di sa luya pa nakong tiyan, tagsa lang una ka sud-an kada kaon. Apan sama sa ubang hilas-hilas nga mga panumpa daghan ang tentasyon. Daghang kasaulogan nga di kabalibaran. May mga nanghatod na sab sa kinaham nakong mga putahe sa sibyaanan.
Natental na ko’g kaduha. Mas daghan pa hinuong nabalibaran. Mas mabinantayon pa gyud ko dinhi. Kay wa ra ba intawoy makatabang. Hinaot nga nalingaw sa iyang sayaw ug reunion ang akong gibiyaan sa Sugbo. Aron nga di makamatngon nga wa pa ko hingpit nga maayo. Nakaseguro hinuon kong makasabot siya. Nga sayon ang pagtagam. Mas lisod ang pagpaggapos sa pagduda sa matag sunod nimong lakang sa kabalaka nga mabuwasot pag-usab sa laksot uyamot nga mga kasinatian.
- Latest
