Budget sa katawhan
Nag-abot dinhi sa Sugbo ang mga tigpatuman sa bag-ong paagi sa paggahin sa kuwarta sa gobyerno nga kaniadto nakab-ot lang pinaagi sa damgo apan karon inanay nang nahatagan og bayhon. Palihug basaha ni ug mahimo kang mopakpak:
Gihatagan og gahom ang batakang mga sektor sa katilingban pagsugyot og mga proyekto nga makatagbaw sa labing mahinungdanon ug dinaliang panginahanglan pagsulbad sa kakabos;
Pundohan ang napiliang mga proyekto ginamit ang regular nga budget sa nagkalainlaing mga buhatan sa nasudnong gobyerno; ug
Gawas nga gidasig sa pagbantay sa aktuwal nga pagpatuman sa proyekto gihatagan pa gyod og katungod ang batakang mga sektor pag-apura sa hingtungdang mga buhatan.
* * *
Kabilin ni anhing DILG Secretary Jesse Robredo ang Bottom Up Budgeting (BUB). Gipadayon sa nipuli nga si DILG Secretary Mar Roxas apan ginganlan na og Grassroots Participatory Budgeting (GPB). Ikatulong tuig na ron sa pagpatuman ini. Gikan sa pipila lang ka pilot areas, ang tanan nang local government units (LGUs) ang apil ning talagsaong programa.
P15 milyones ngadto sa P50 milyones ang gahin nga makuha sa matag LGU. Apan way bisan usa ka dako nga makuha kun mag-iyahay. Kinahanglang makigsabot ang civil society organizations (CSO) sa lokal nga mga opisyal kay kinahanglang mohatag og 5% ngadto sa 15% nga counterpart ang LGU sa mapiliang mga proyekto.
* * *
Itlog ang nakuha sa Dakbayan sa Sugbo sa unang tuig sa GPB. Kay inay dasonan ang mga proyektong napilian sa CSOs sa dakbayan, nagtukod si Mayor Mike Rama og iyang kaugalingong mga pundok. Dihang gisumiter sa sunod ang-ang, nabasurang duha: Ang mga proyekto sa CSOs way pirma sa mayor; samtang kang Rama wa dasoni sa CSOs.
Sa samang tuig, nakakuha og kapin P20 milyones nga mga proyekto ang Dakbayan sa Mandaue. Salamat nga nakakat-on og leksiyon, nagkasabot na silang Rama ug ang CSOs ug makaangkon nang Dakbayan sa Sugbo og P65 milyones nga mga proyekto sa ikaduhang tuig.
* * *
Gihangop sa mga delegado sa Kabisay-an ug Mindanao nga nagtigom dinhi sa niaging semana ang imbestigasyon nga gipasidaan sa party-list groups sa GPB tungod sa kabalaka nga way kalainan sa Priority Development Assistance Fund (PDAF) ug Disbursement Acceleration Program (DAP) nga pulos gibasura sa Korte Suprema. Kini bisan pipila sa mga mangimbestigar hagbay rang niapil sa GPB.
Si Jovie Cadungog, Visayas Coordinator sa GPB, niawhag sa mga sektor nga ganahang moapil sa GPB pagtambong sa mga tigom sugod karong Septiyembre. Kinahanglan lang pamatud-an ang track record ug kaligdong sa ilang pundok. Kun daghang pundok ang magrepresentar sa usa ka sektor, magpili og representante kay usa ray boto sa matag sektor. Nanghinaot si Cadungog nga magkahugpong ang mga sektor bisan sa lagyong kalungsoran aron nga ilang tingog di lang sa mga politiko maoy mopatigbabaw.
- Latest
