Kinsay angay modawat sa benepisyo sa SSS

Dear Atty. Divine,

Duna lang unta ko’y pangutana labot sa SSS sa akong bana nga bag-o lang namatay. Ikaduha ko nga asawa sa akong bana ug duna siya’y duha ka anak sa una niya’ng asawa. Kami duna sa’y duha ka anak nga pulos pa menor de-edad. Kasado mi sa akong bana. Ang akong pangutana attorney kun kinsa man ang makadawat sa SSS pension sa akong bana, ang mga anak sa iyang unang asawa?  O  ang among duha ka anak? Unsa may akong buhaton aron akong makuha ang SSS pension sa akong bana? -  Emma

Dear Emma,

Kun ang miyembro sa SSS ang mamatay, ang iyang primary beneficiaries maoy makadawat sa benepisyo niini. Base sa Social Security Act kon RA 8282, ang primary beneficiaries nga gilatid sa balaod naglakip sa dependent spouse ug ang mga anak nga mga menor de-edad. Buot ipasabot nga kun ang imong mga anak menor de-edad pa, sila ang adunay katungod nga makadawat sa benefits sa imong bana sa SSS ug ikaw isip legal wife makadawat usab ka sa maong death benefit. Ang mga anak sa iyang unang asawa kun nagpangedaron na og 18 anyos pataas dili na kini makadawat sa maong benepisyo. Bisan ang illegitimate nga anak sa  miyembro sa SSS  makadawat ‘sab sa maong benepisyo apan katunga lang sa gidawat sa legitimate nga anak.  Samtang ang surviving spouse nga nagdawatan og pension kun pananglit maminyo pag-usab mahunong na ang iyang pension gikan sa SSS.  Ang maayo nimong buhaton karon mao ang  pag-adto sa SSS aron imong mahibaw-an kun unsay mga rekisitos sa pag-claim sa death benefits. - Atty. Divine

Alang sa inyong pangutana, ipadala lang sa  Legal Corner sa Banat News sa V. Gullas Street, Cebu City or email sa  [email protected] ug akong tubagon ang inyong pangutana pinaagi sa akong column matag adlaw’ng Miyerkules ug Domingo.