Hinabang

Usa ka 40-footer nga container naablihan na human sa pila ka buwan sukad sa pag-abot niini dinhi. Ang sud sa container pulos relief goods alang sa mga biktima sa bagyong Yolanda.

* * *

Daghan sa maong relief goods na-expire na. Lakip niini mga pagkaon. Hayan daghan na ang namanaw samtang gihuwat pa ang pag-abli sa gihisgutang 40-footer container.

* * *

“This is criminal neglect,” matud pa sa usa ka civic club member. “There must be a thorough investigation,” matud niya. Ug angay’ng paatubangon kuno og kaso ang responsabli sa maong “criminal neglect.”

* * *

Wa pa gani mahurot og ayuda ang mga biktima ni Yolanda, naa na sad si Glenda kinsa mihimo usab og dakong kadaut didto sa Luzon. Daghan ang nanghinaut nga mga hinabang alang sa mga biktima ni Glenda mapang-apod-apod dayon, dili parehas sa ubang hinabang sa mga biktima ni Yolanda nga grabeng langaya ang pagpanghatag. Kini suma sa balita.

* * *

Kadtong mga nanabang sa mga biktima ni Yolanda nga nangunay gayud sa paghatag sa ilang hinabang giabibahan sa mga biktima. Gidayeg. Walay kalangay nga nahitabo. Kini tungod kay naa sa pribadong sektor. Walay politika nga nakasud.

* * *

SA LAING BAHIN ... Daghan salamat sa mga magbabasa ning Banat News diha sa Capitol ug Cebu City Hall diin aduna kita’y daghang higala ... Happy 5th wedding anniversary ngadto nila ni Jack ug Jean Luna (nee Castronuevo) kagahapon.