Napoles ma-state witness?

Mayoridad sa mga internetan dinhi mosugot rang sudlan og barumbado nga mga estudyante nga way laing bisyo gawas sa  pagpakita sa ilang abilidad sud sa internetan.

Ang ka wa nila’y batasan sa personal nilang pagkatawo dad-on sa mga  lugar nga iya sa publiko pinaagi sa pagsiyagit-siyagit mura’g sila ray tawo sud sa internetan.

Ang mga tigbantay usab og internetan nga susama ka way batasan sa mga estudyante nga  linggaw og utok, pasagdan lang ang kalangas sud sa ilang internetan nga way kaikog  sa mga  tawo nga may gitrabaho ug di gusto og langas nga palibot.

Hinuon gawas niini, may  ubang internetan  kansang mga tag-iya tarong  og utok, kaantigo mobadlong ug mosanta sa way batasan nilang mga kustomer.

* * *

Ang COSAP nagpakita lang sa iyang ka-inosente bahin sa gidiling druga.

Nagpaka-aron ingnon nga nakurat tungod sa migrabe pag-ayo nga pagkuyanap sa mga illegal drug user ning siyudad. Ang ilang gibasehan mao ra  ang kadaghan sa mga adis-adis nga mga empleyado sa barangay.

Wa tan-awa ang kabaga na sa tiggamit niini, sukad pa sa sayong mga tuig sa 1970.

Unang nabaniog ang shabu sa Pasil, unya misikat dayon kini  sa Tangke, Talisay ug karon tanang barangay sa patag ug bukid pulos na may adis-adis.

Di na kini ma-kontrolar kay gihimo na nga kalingawan sa mga tawo nga kriminal og hunahuna.

Sayon sila nga makapanlugos, manulis, mopatay ug makakuwarta, hinungdan nga daghang  mga awtoridad sa gobiyerno  usab nga miintra niining bisyoha.

* * *

May mga nabalaka nga himoong state witness sa gobiyerno si  Janet Lim- Napoles.

Nagduda ang kadaghanan nga kun ma-state witness si Napoles mas gaan-gaan siya og silot kay sa mga tawo nga iyang kakunsabo sa  pagtulis sa atubang sa mga Filipino.

Mura ra ba’g ingon niini ang dagan  sa hustisya sa nasud ilabi na kun butaan, ug amangon nimo ang mga maghuhukom sa binilyon ka pesos nga suborno.

Ingon usab niini ang kabalaka sa taga Mindanao kinsa nagduda  sa gitukod nga Bangsamoro agreement nga himuong hanig sa mga Muslim aron ibuwag ang Mindanao gikan sa Pilipinas.([email protected])