Tsansa alang sa kaluwasan

Panahon karon sa pagkabanhaw ni Kristo human sa Iyang pagkamatay. Ug usa kini sa labing importante nga adlaw sa kalibotan sa Kristiyanismo nga puno sa pagmaya sa bongga nga selebrasyon.  

Bisan pa man niini. Daghan ang malimot sa tumong sa selebrasyon karon. Tungod lagi kay panahon na karon sa ting-init, daghan ang magpabugnaw sa mga beach ug uban pang mga resorts. Kini dili tuyo sa pipila nga magselebrar sa pagkabanhaw sa atong manluluwas. Tuyo lamang nila ang pagpabugnaw sa init nga panahon. Ang uban tuyo lamang nga mo-take advantage sa katapusang adlaw sa taas nga pahuway tungod kay balik na usab sila sa ilang trabaho pagkaugma.

Ang pagkabanhaw ni Kristo mao ang panahon sa paghinuklog sa atong mga sala. Adlaw karon sa paghuna-huna sa ka importante sa Iyang kamatayon ug pagkabanhaw sa atong kaluwasan. Ang tuyo sa pagpakamatay ni Kristo mao ang pagluwas kanato gikan sa atong mga sala. Tungod sa iyang pag-ula sa iyang dugo ibabaw sa krus, iyang gibuntog si Satanas sa ilang dakong away alang kanato.

Ug mapasalamaton kita niini. Kini tungod kay kadtong iyang dugo nga midagayday sa krus maoy naglimpyo kanato sa atong mga sala aron sa ingon nga aduna usab kitay tsansa sa kaluwasan. Kun dili pa tungod sa iyang pagpakamatay ibabaw sa krus, wala untay kaluwasan ang katawhan gikan sa sala. Dakong suwerte kita dinhi sa kalibotan tungod kay Iya kita nga gipakamatyan.   Tungod sa iyang dakong gugma kanato, nagpakamatay si Kristo aron makabaton kita og dakong tsansa sa kaluwasan. Ug angay kita nga maglipay tungod niining dako niya nga gugma kanato.

Apan ang kaluwasan makab-ot lamang kong atong isubmiter usab ang tanan ngadto sa kahitas-an. Sa atong pagdawat sa Ginoo isip personal nato nga manluluwas, dako ang kasigurohan usab nga makab-ot nato ang kaluwasan.

Matud pa sa Ginoo, ang motuo Kaniya ug nagasunod sa Iyang mga sugo mao lamang ang maluwas. Kini nagpasabot nga dili lamang kita motuo kaniya apan obligado usab nga mosunod kita sa iyang mga sugo.