Usa ray hawod?

“Wa ko’y utang sa WT,” mao ni gitataw ni Cebu City Mayor Mike Rama atubangan sa mga pagduda nga gitugotan niya ang mga sabutsabot sa pag-areglo sa misteryusong pagkawagtang sa dul-an sa gatos ka punoan sa kahoy gikan sa Sergio Osmeña Road. Subli siyang nanghunaw sa baruganan sa tagduma sa Parks and Playground Commission, Dr. Librando Macaraya, nga inay ikiha pabayron ang WT og P1.7 milyones para sa nawa nga mga kahoy.

Gani, nisugilon si Rama nga gikasab-an niya si Willy Te, tag-iya sa WT, kay wa magtagad pagsusi sa iyang buhatan sa City Hall, nga WT maoy kontraktor, human sa makalilisang nga linog niadtong Oktubre.

* * *

Nipasalig sab si Rama nga di siya modason sa bisan unsang pagsuway pag-areglo sa kaso. Matud niya may krimen nga nahimo sa pagkawat ug pagtago sa mga punoan sa kahoy gikan sa center island sa dan sa North Reclamation Area nga gisemento sa WT.

Nipasabot si Rama atol sa Arangkada sa DYAB Radyo Patrol nga wa siyay labot sa mga tigom sud sa City Hall nga gitambongan sa kadagkoan sa WT ug sa Department of Environment and Natural Resources (DENR). Nangayo si Rama og dugang lugway paghingpit sa imbestigasyon sa City Attorney’s Office. Di pa igo para niya ang CCTV footage nga nagpakita sa mga ekipo ug trabahante sa WT nga nangibot sa mga kahoy.

* * *

Kun way labot si Rama sa mga paningkamot pag-areglo sa kaso, nganong labihan man niyang hiloma sukad sa pagkabisto sa pagkawagtang sa mga kahoy niadtong Marso 31? Nitubag siya nga nahigot sa daghang gimbuhaton, apil na sa pagtabang sa mga biktima sa sunog sa Lorega San Miguel ug sa mga biktima sa demolisyon sa Apas.

Apan napakyas si Rama pagpasabot nganong wa niya palihoka ang kapolisan ug ubang buhatan sa City Hall pagpangita sa 79 ka punoan sa kahoy sa unang mga adlaw sa pagkabisto sa pagkawa kanus-a may kahigayonan pa untang maluwas ug matanom pagbalik.

* * *

Atol sa samang pakighinabi, subling gipanghimakak ni Rama ang mga pasangil nga nahimo ra siyang pahoy sa City Hall. Kay pundok sa iyang mga paryente ug mga alyado, nga giingong gipangulohan sa magtiayong Rene Mercado (MCWD Chairman) ug Dr. Lucelle Mercado (City Administrator), maoy tinuod nga hawod sa iyang pamunoan.

Matud ni Rama gikinahanglan niya ang tabang sa iyang mga alyado ug mga magtatambag aron matuman ang iyang gisaad nga mga proyekto ug mga programa sa mga Sugbuanon. Gihangop ug gitahod niya ang ilang mga sugyot. Apan gitataw ni Rama nga wa sila pilia, siya ang gipili sa mga Sugbuanon. Maong nipasalig si Rama nga siya ang mayor ug siya ang kataposan nga mohukom ug siya ang matuman.

[email protected]