Kolektor gipatay

CEBU, Philippines - Usa ka kolektor sa usa ka lending firm ang gipatay samtang kini nagkaon pasado alas-4 sa hapon sa miaging adlaw diha sa dalan Englis sa sitio Fatima sa barangay Guadalupe ning dakbayan.

Ang gipusil patay mao si Fernando Morales, alyas ‘Nanding’,46, nga driver/collector sa GSJP Lending and Convenience Store nga nahimutang sa maong lugar ug residente sa barangay Buhisan siyudad sa Sugbu.

Si Morales nakaangkon og pinusilan sa tiyan ug siko kinsa daling gidala sa Chung Hua Hospital apan nakabsan sa iyang kinabuhi.

Si Cherry Ann Ocampo, 21, sales lady nga kauban sa biktima mitug-an sa kapolisan nga nag-snacks ang biktima dihang kalit kining giduol sa duha ka lalaking nagsakay og motorsiklo ug kalit gipusil makadaghang higayon.

Ang mga sakop sa Crime Scene Investigation Unit (CSIU) nakahipos og upat ka basiyo ug duha ka slugs sa .45 nga kalibre sa armas.

Apan pagkataud-taod, miabot sa crime scene ang pag-umangkon sa biktima nga si Janise Flores sakay sa motorsiklo nga gimaneho sa ginganlan og Elrich kinsa nasaypan usab sa pipila ka mga saksi nga giingong haom ang duha sa panagway sa mga mamumuno.

Tungod niini girekisa sila sa kapolisan ug nakuhaan og.45 nga kalibre si Flores nga giluklok sa ilawom sa iyang brief, duha ka paketeng gidudahang shabu ug kwarta, samtang nakuhaan usab og .22 magnum nga derringer si Elrich.

Apan matud pa ni Chief Insp. Romeo Santander, hepe sa City Intelligence Branch (CIB) nga nahinabi sa Banat News kagahapon sa hapon ang mga saksi mibakwi sa ilang unang pamahayag ug may gitudlong hulagway sa rogues gallery nga kaparehas og dagway sa gunmen.

Ang maong tawo sa hulagway, usa sab ka drug personality diha sa barangay Ermita. Sumala pang Santander nakadawat sila og report nga mitiwalag sa usa ka drug personality ang biktima ug mibalhin sa laing grupo.

Dugang pa ni Santander base sa ilang impormasyon gawas sa trabaho niini sa lending firm tigkolekta usab kini sa drug money kaniadto sa usa ka druglord sa Ermita, samtang ang gunman nga gitumbok mao ang drug courier sa grupo.

Samtang gidugang ni Santander nga si Flores dunay tulo ka mga kasong pagpatay sa tulo ka mga police assets sa Cebu City Police Office (CCPO) karung tuiga diha sa Carbon area. (/EIM)(BANAT NEWS)