Masiao collector gipusil patay

CEBU, Philippines - Usa ka giingong kolektor sa masiao ang gipusil patay diha sa barangay Ermita ning dakbayan sa Sugbo niadtong Sabado sa buntag.

Ang biktima giila sa kapulisan nga si Narciso Cervantes Antopina, 42, nga molupyo sa Sitio Barracks, sa maong barangay.

Base sa imbestigasyon sa kapulisan, gipusil si Antopina sa usa ka aliyas “MM” diha sa ulo samtang kini naglakaw sa dalan Calderon sulod sa Freedom Park.

Human sa pagpusil daling misibat ang mamumuno padulong sa sudlonong bahin sa maong dapit ug wala na maabti pa sa kapolisan.

Miresponde pa ang mga membro sa Emergency Rescue Unit Foundation kon ERUF apan wala na nila maabting buhi ang biktima.

Si SPO3 Rey Cuyos, homicide investigator, nagkanayon gisundan ang biktima sa mamumuno ug dihang nakapaduol gipusil kini taliwala sa kadaghanan sa mga tawo.

Apan nasagmuyo ang kapolisan tungod kay pulos ra nangambot ang mga tawo diha sa crime scene ug mibalibad pagtabang sa kapolisan aron mahatagan og hustisya ang kamatayon sa biktima.

“Daghan kaayo og tawo atong mga higayuna apan wala gyuy mi-cooperate sa among investigation,” matud pa ni Cuyos.

Gisusi karon sa kapulisan ang anggulong may kalambigitan sa illegal gambling ang motibo sa maong krimen.

Nakuha sa kapolisan sa nahitabuan ang usa ka deformed slug ug kabhang sa bala gikan sa .45 nga pistola. (EIM)(BANAT NEWS)