2 Patay sa pagpamusil

CEBU, Philippines - Patay ang usa ka technician sa video karera machines human gipaulana’g bala sa wala mailhing mamumuno samtang napagan ug namatay usab ang 14-anyos nga batang lalaki nga manindahay og duwaan diha sa sitio San Pedro sa barangay Duljo-Fatima siyudad sa Sugbu sa miaging gabii.

Ang biktima mao si Cornelio Ramos Jr., 44, usa ka paralitiko ug tig-ayo sa mga nangaguba nga video karera machines diha sa maong lugar, samtang napagan ug namatay si Romel Larisma, 14, taga sitio Buli sa nahisgutang barangay.

Sa pasiunang imbestigasyon nila ni SPO1 Victor Ruel Ayuman, PO3 Lou Pagara ug PO1 Esmer Escultor sa Homicide Section nagbutyag nga kalit lang miabot ang wala mailhing mamumuno ug mipaulan og bala ni Ramos nga naglakaw niadtong higayona.

Ang igsuon sa 14-anyos nga napagan mitug-an sa kapulisan nga lima ka sunodsunod nga buto sa armas ang ilang nadungog sa dihang gipusil sa mamumuno si Ramos.

Tulo ka samad pinusilan sa bukobuko ug ulo ang naangkon ni Ramos ug nakadagan pa kini apan gisundan ug gitiwasan pagpusil sa mamumuno hinungdan nga namatay kini diha dayon.

Matud ni Pagara nga posibleng ang ikaupat nga bala maoy nakaigo sa bata nga naglingkod 18-metros gikan sa nahimutangan ni Ramos.

Ang mga saksi miingon nga sa wala pa nahitabo, ang mamumuno nagsunod-sunod kang Ramos.

Si Grace Mancao kapuyo sa biktima mitug-an nga nakadungog siyag butobuto sa armas human mibiya sa ilang balay ang iyang kapuyo aron mopalit og tambal.

Sumala pa ni Sr. Insp. Jul Muhammad Jamiri, hepe sa Cebu City Homicide Section nakadawat sila og balita nga si Ramos nalambigit sa ilegal nga drugas sa maong dapit.

Dugang pa ni Jamiri gikatahong gibiyaan ni Ramos ang unang drug personality sa maong dapit ug mibalhin o nangamo sa karibal nga drug personality sa unang agalon niini.

“He changed loyalty and he was seen as a threat to his previous associates which resulted to the shooting,” matud pa ni Jamiri kinsa midugang nga ilaha na usab nailhan ang duha ka killers. (EIM) (BANAT NEWS)