Hadlok diay sa 'takal' maong mieskapo

CEBU, Philippines - Wala na makaugpo pa ang puganteng miipsot sa iyang jailguard escort atol sa hearing niini sa korte niadtong milabay’ng semana dihang kini napusilan sa mga polis nga midakop kaniya diha sa barangay Poblacion Oriental sa lungsod sa Consolacion.

Ang napusilan mao si Ricky Andojar, 20, taga sitio Mansawa sa barangay Binaliw bukirang lugar dinhi sa dakbayan sa Sugbu nga may kasong robbery ug illegal possession of firearm.

Si Andojar napusilan sa walang paa niini ni PO3 Reynaldo Solante, ang team leader sa Provincial Intelligence Branch (PIB) kagahapon sa alas-10 sa buntag didto sa balay sa higala sa suspek nga ginganlan og Eboy.

Matud pa nakabantay ang suspek sa pag-abot sa mga polis ug misuway og dagan apan niining tungora gipusil kini. Si Andojar nakaipsot sa operasyon sa Mandaue City Police Office ug Bureau of Jail Management and Penology niadtong milabay’ng semana apan nakalayat sa bintana.

Si PO3 Solante mitug-an nga dako og natabang si Eboy nga madakpan si Andojar tungod kay mao kini nagtultol kanila sa suspek.

Si Andojar mitug-an sa mga tigbalita nga napugos siya pag-eskapo niadtong higayona kay nahadlok na siyang mobalik sa iyang selda tungod sa ‘takal’ o pagbunal kaniya tungod kay wala siya makabayad sa iyang giutang nga sigarilyo ug pagkaon tungod kay wala moduaw kaniya.

“Karun paman ko kadungog ana, pero amo nang imbestigahan,” matud pa ni Insp. Bryan Rey Mercado, deputy jail warden sa Mandaue City Jail.

Ang takal karaan nang termino sa mga gikan sa sulod sa bilanggoan dinhi sa Sugbu nga silot sa mga ‘mayores’ sa brigada o selda ngadto sa mga priso nga makasala sa ilang ‘patakaran’ sa sulod. Sumala pa sa mga priso, ang gamiton sa ‘pagtakal’ mao ang latigo o bunal nga ginama sa exterior sa ligid.

Gihimakak usab ni Mercado nga dunay namaligyag pagkaon ug sigarilyo sulod sa City Jail. (BANAT NEWS)