Banat ( Leaderboard Top ), pagematch: 1, sectionmatch: 1

LTO-7 moimbestigar sa reklamo ni Oliva vs TF Alpha

CEBU, Philippines - Dunay imbestigasyon nga himuon ang director sa Land Transportation Office-7 kabahin sa tinuoray nga nahitabo kalabot sa reklamo ni Cebu City treasurer Ofelia Oliva ug iyang anak batok sa unom ka mga sakop sa Task Force Alpha niadtong Biyernes sa gabii diha sa barangay Camputhaw sa dakbayan sa Sugbu.

Si LTO-7 regional director Raul Aguilos miingon nga dunay katungod ang reklamante nga mopasaka og reklamo batok sa pipila ka mga sakop sa TFA.

Ang Task Force Alpha usa ka volunteer group nga adunay 80 ka mga sakop giila sa LTO nga motabang sa implimentasyon sa mga lagda sa trapiko ug mga regulasyon.

"They do not operate everyday but on a special schedule made by LTO," matud pa ni Aguilos kinsa midugang nga atol sa hitabo tali sa mga Oliva ug si Stephen Ybañez ug kaubanan sa TFA nagpahigayon og "Oplan Ilaw."

Si Ybañez ug kaubanan gireklamo sa mga Oliva ngadto sa Cebu City Police Office tungod kay ang anak niini nga si Karen Olvido gikatahong gisinghagan dihang gihangyo niini si Ybañez nga ipadukdok ang iyang suga nga napawong.

Giingong wala sad ihatag ni Olvido ang iyang lisensya ug gisirad-an ang iyang sakyanan bisan giunsa pagtuktok sa mga TFA. Ang komosyon miresulta sa pagdasok sa trapiko sa maong dalan. Mibahad hinuon si Aguilos nga kun mapamatud-ang sad-an ang maong mga deputized agents basehan kini aron i-revoke ang ilang deputation. (BANAT NEWS)  

  • Follow Us: