Konsehal mipatay sa bayaw

CEBU, Philippines - Namatay ang usa ka mag-uuma human kini pusila sa usa ka konsehal sa barangay sa Upper Bugho, lungsod sa San Fernando sa miaging Lunes sa gabii.

Si Marcos Genon, 44, minyo, nasabak sa tuong bahin sa lawas ug wala na makaabot nga buhi sa Carcar City District Hospital.

Ang mipatay kaniya giila sa kapolisan nga mao si Konsehal Heracleo Pacquiao, 50, bayaw sa biktima ug konsehal sa barangay Upper Bugho.

Si SPO4 Ruben Reynes, imbestigador sa San Fernando Police Station nagkanayon nga sa wala pa ang hitabo ang biktima kinsa igsuon sa asawa sa suspek giingong miadto sa balay sa naulahi ug nangisog.

Ang suspek nga natulog niadtong higayona nakamata gumikan sa giingong kakusog sa tingog sa biktima ug didto magsugod ang ilang sinukliay sa   bug-at nga mga pulong.

Matud ni Reynes nga sumala pa sa pamilya sa suspek nga ang biktima maoy nanion og una sa armas ngadto sa suspetsado busa naningkamot ang naulahi nga madepensahan ang iyang kaugalingon ug giilog ang armas sa suspetsado kansang kalibre wala matino.

Human kini mailog, gikablit sa suspetsado ang gatilyo   ug sa pagbuto   niini nasabak ang walang bahin sa lawas sa biktima. Si Anastacia Reponte nga silingan sa suspetsado maoy nakadungog sa sunod-sunod nga buto sa armas apan wala kini mogawas sa ilang balay tungod sa kahadlok.

Napunitan sa kapolisan sa crime scene ang tulo ka kabhang sa   bala   sa wala pa matino nga kalibre sa armas.

Ang lawas sa biktima nga nagbuy-od sa daplin sa karsada nakit-an ni Nestor Tausa, drayber sa   habal-habal niadtong Martes sa alas 4:00 sa kaadlawon.

Iya dayong gipahibawo si barangay captain Pedro Sebial sa Upper Bugho kinsa mao na usab ang mitawag sa kapolisan.

Gihatud nila ngadto sa tambalanan sa dakbayan sa Carcar ang biktima diin siya ideklarar nga dead on arrival pinaagi ni Dr. Allan Mercado.

Pasado alas 10:30 niadtong Martes sa buntag si Pacquiao boluntaryong mitahan lakip na ang usa ka revolver ngadto ni Kapitan Sebial.

Natanggong na kini karon sa prisohan sa kapolisan samtang nagpaabot sa tukmang sumbong nga isang-at batok kaniya. (WC)(BANAT NEWS)