Senina sa BOPK gikataw-an ni Rama

CEBU, Philippines - Nakapalibog sa katawhan ang senina  nga gipanul-ob    sa mga sakop sa Bando Osmeña Pundok Kauswagan (BOPK) sa pagsuroy-suroy niini sa nagkadaiyang barangay, matud pa ni Mayor Michael Rama.

Kini tungod kay may mga politiko nga sakop sa maong grupo nga nagsul-ob na og sapot nga inimprintahan og pulong nga “Konsehal” apan dili konsehal.

Samtang ang polo shirt nga gisul-ob ni   Kongresista Tomas Osmeña gimarkahan og “Mayor” samtang siya usa ka kongresista.

Si Rama nagkanayon nga sa ilang “Team Rama” nga grupo tinarong nga ngalan sa nagsul-ob sa senina ang gimarka ug di kay marka nga makalibog ug makapalibat sa magbasa.

Nakaingon si Rama nga kun wa mangaraan, karon pa nagpalahi og estelo ang iyang mga kaatbang nga wala na makahunahuna og tukmang desinyo bisan sa ilang gipanul-ob nga mga biste.

Mibahakhak og katawa si Rama sa gibuhat   ni Osmeña kinsa mipasalig nga doblehon niini ang mga financial assistance sa matag barangay kung mahibalik kini sa pagka-mayor ning dakbayan.

Matud pa sa mayor nga susama na sa “bribery” kun panuburno ang gibuhat sa iyang kaatbang apan dili niya kini hatagan og pagtagad sanglit prayoridad niya karong panahona ang iyang trabaho isip mayor.

Dugang pa ni Rama nga wala siya mahulga sa giingong pagsugod na sa pagpanglamano sa iyang mga kaatbang. Nagkanayon ang mayor nga anaa sa huna-huna sa tawo kung kinsa ang ilang pilion kay sila maoy tinuoray nga nasayod kung kinsa gyud nga mga politiko ang nakahatag og maayong proyekto sa publiko.

Gitambagan sa mayor si Osmeña nga labing maayo nga mopunting kini sa iyang trabaho didto sa kongreso ug dili kay anhi siya magyampungad sa dakbayan sa Sugbo samtang ang iyang trabaho sa kongreso isip magbabalaod iyang gipasagdan. ( WC)