Larang nga pawikan sa pasil ipahunong

CEBU, Philippines - Gimando ni Mayor Michael Rama ang pag-imbestigar ug pagpahunong na sa pagpatay, pagluto ug pagpamaligya og pawikan diha sa mga ‘larangan’ sa barangay Pasil ning dakbayan.

Ang Bantay Dagat Commission ug Bureau of Fisheries and Aquatic Resources (BFAR) giawhag ni Rama nga susihon si kinsa ang namaligya niini sa maong barangay nga kaniadto pa wala masumpo bisan dakong gidili sa balaod.

Ang kamandoan ni Rama gipagawas human migawas ang report sa usa ka national news site nga naghisgot nga 80 ka kilong karneng pawikan ang gipamaligya sa maong barangay matag adlaw.

Hagbay rang gidili ang pagpamaligya niini sukad pa niadtong 2001. Ang Wildlife Conservation Act, o Republic Act No. 9147 nagsilot sa makalapas niini nga dunay multa nga moabot ngadto sa P100,000 o usa ka tuig nga pagkapriso.

Giangkon ni Rama nga hagbay ra siya nakadungog sa maong problema gani kanunay ang pagpanakop niini.

Nasayran sa Banat News nga tag-P60 matag panaksan ang pagpamaligya sa pawikan diha sa Pasil ug kusog kaayo ang halin niini matag-udto.

Usa ka kasaligang tinubdan ang misaysay nga usa sa estilo sa pagpalusot sa pawikan mao nga itago kini atol sa pag-transport sa mga isda diha sa Pasil Fish Market/Port gikan sa Bohol.

Sa artikulong namantala sa maong national news moabot ngadto sa 80 ka kilong pawikan ang mahalin matag adlaw diha sa Pasil ug giingong dumugan kini kanunay sa mga tawo.

Matud pa nga duna pu’y mga adunahan nga modagsa sa maong dapit nga magdala og mga sakyanan ug ang pagkaon og pawikan maoy ilang tuyo. ( EIM) - BANAT NEWS