Bangka nalunod upat naangol

CEBU, Philippines - Upat ka tawo ang naangol human malunod ang motorbanca nga ilang gisakyan didto sa kadagatan sa dakbayan sa Toledo kagahapon sa alas 2:00 sa kaadlawon.

Ang mga biktima mao sila si Mario Montemayor,45; Edgardo Casilac, 46; Lendon Carcusia,28 ug Marlon Manigos, 24.

 Nasayran sa impormasyon nga nakuha sa Banat News gikan sa Philippine Coast Guard nga ang mga biktima nga nagsakay sa M/V Mary Sunshine nagpaingon sa Negros Occidental gikan sa Toledo.

 Apan tungod sa kadagko sa bawod nga mikusokuso sa ilang sakyanan miliki ang kasko niini hinungdan nga dali kaayong nakasulod ang tubig hangtod nga nalunod ang maong sakyanan.

 Aron masalbar ang ilang kinabuhi, ang mga biktima mibiya sa maong sakyanan ug nangambak sa dagat ug nanglangoy hangtod nga nakaabot sila sa baybayon barangay Bato, dakbayan sa Toledo.

Nasayran sa PCG gikan kang Carmelita Cristita, tag-iya sa motorbanca ang bahin sa maong hitabo nianang alas 2:00 sa kaadlawon hinungdan nga ang Coast Guard Detachment sa Toledo daling nakapahigayon og rescue operation.

Miabang sila og tulo  ka pumpboat aron unta pagsalbar sa upat ka pasahero sa sakyanang nalunod apan nanlangoy na ang upat paingon sa barangay Bato, dakbayan sa Toledo gigamit ang life jacket sa ilang sakyanan.  - BANAT NEWS