300 Pinoy crew sa cruise ship naluwas

CEBU, Philippines - Dul-an sa tulo ka gatos ka mga Filipino crew ug pasahero ang naluwas apan 21 kanila ang nangaangol tungod sa pagtakilid ug pagkalunod sa usa ka Italian cruise ship sa Giglio Island sa Tuscany sa nasud sa Italy niadtong Biyernes sa gabii.

Sumala pa sa Philippine Department of Foreign Affairs (DFA) 296 ang naluwas nga mga Filipino apan nagpadayon pa ang emergency response team sa pagsiksik sa mga cabin sa maong barko ug sa mismong isla sa Giglio nga giluwanan sa mga Filipino.

Ang Costa Concordia cruise liner may gibug-atong 114,500-tonelada.

“They are still accounting for the Filipino crew members on board the crew ship. So far, they have accounted for 296 Filipino seafarers. They are still checking in other areas like churches, hotels and schools where passengers and crew members were transferred," sumala pa sa tigpamaba sa DFA nga si Raul Hernandez sa GMA "News TV Live" kagahapon sa buntag.

Sa mao usab nga report giingong may 29 ka mga Filipino kitchen crew members ang na-trap sa maong barko nga ang katunga sa kasko nalunod na.

Sumala pa sa pamahayag sa DFA : “At least 21 Filipino seafarers were reported to be injured, one with a broken arm, another with hypothermia.”

Si Ambassador Virgilio Reyes sa Philippine Embassy sa Roma mipadala na og emergency response team aron matabangan ang mga Filipino survivors.

Ang maong barko adunay 4,000 ka tawong pasahero ug crew. Sa 1,000 ka crew 300 niini mga Filipino sumala pa sa DFA.

Sumala pa usab sa maong report aduna nay tulo ka tawo ang nakalas human masangad ang maong barko ug mitakilid. (BANAT NEWS)