Banat ( Leaderboard Top ), pagematch: 1, sectionmatch: 1

Portalets ipadala sa Cagayan de Oro

CEBU, Philippines - Naglaraw si Mayor Michael Rama nga mopahulam og portable toilets sa siyudad ngadto sa Cagayan de Oro nga naapektohan pag-ayo sa flash flood .

Kagahapon gipasusi na ngadto pinaagi sa Department of Public Services (DPS) ang sitwasyon sa mga evacuation centers kung gikinahanglan ang portable toilets.

Nasayran nga usa sa giproblemahan karon sa mga evacuation site sa maong dapit mao ang kakuwang sa pansayan gumikan kay nagdasok ang linibo ka mga tawo matag evacuation center.

Ang portable toilet sa siyudad moabot sa dul-an sa 100 apan kasagaran niini gamiton karong Sinulog 2012 busa dul-an lang sa 20 ang puwedeng mapadala niini ngadto sa Cagayan.

Gipahibalo usab ni Rama kagahapon nga dili maabtan og Enero ang pagtunol og hinabang ngadto sa mga lugar nga naapektohan sa Bagyong Sendong nga moabot ngadto sa P6 milyones.

Nagpadala na niadtong Miyerkules sa gabii ang siyudad og 100 ka lungon tungod sa kakulang na niini sa Cagayan de Oro City ug sa Iligan City.

Samtang si Oliver Gallardo, supervisor sa Rolling Hills misaysay nga andam usab modonar og lungon ang ilang kompanya ug nangita na sila karon og organisasyon nga mahimong kabinlan niini didto.  (BANATNEWS)

  • Follow Us: